إنتي إلي خمره
#
يا سمرة الحبّيت أعطيكي البِقي
من عمر شاعر مطلبو عندك لِقي
وهالتّقدمه مش بنت غايه ولا غرام
هيدي بحسنة حظّك وقلبي الشّقي
#
شفتك وحبّيتك مش محبّة غِوا
والفضل مش فضل المحبّه ولا الهوا
مصيبتك ومصيبتي تلاقو سوا
من قبل ما عينك بعيني تلتقي
#
حبَّيت كفّي برفقتك باقي الطّريق
وأشعر بحالي وقول صار عندي رفيق
وإنتي بعكسي لابسي التّوب العتيق
وبعدك بخيط الوهم عم تتعنزقي
#
لا تكفري بحبّ الأنانيّه كتير
ولا تفرحي في دبحة الطّير الأسير
خلّي صداقه بينك وبين الضّمير
بلكي نويتي عا طريقو تمرقي
#
لا تأسري الرّوح العطاها الحظّ روح
بكرا الصّبا بيروح وبيترك جروح
بفرد مرّه من الدّنّي بدنا نروح
مش ألف مرّه بالدّنّي رح تخلقي
#
إنت وأنا طَيْرَين بقفاص الضّنا
لبعضنا منشكي مآسي بعضنا
من السّجن كنت بطَيْلِق جناحي أنا
لو بعرفك فيكي جناحك تطلقي
#
يا ريتنا منترك شريعة هالوجود
الفيها الأرانب آكله حقّ الأسود
ونبرم على شي أرض ما فيها قيود
إلّا إله الحبّ والحبّ النّقي
#
شاعر عطاكي آخرة قلبو الحلو
لمّا عرف بالكون غيرك ما إلو
حافظي عا قلب إنتي بداخلو
مش كلّ يوم بقلب رح تتوفقي
#
شاعر نِسي حالو وأهلو والدّيار
وكسّر جناحو الماضيي ولِبْسِك وطار
وحاسبك بمعزّة ولادو الزّغار
كرمال آلامو بحالو ترفقي
#
حاجي تقولي بالصّدف ما في ثبات
مين الصّدف إنتي وأنا والمعجزات
وحاجي تقولي الوصل قبر الذّكريات
لو ما وصول الميّ ما بتخلق نبات
بطمّنك حبّك بقلبي واجبات
وإنتي إلي خمرا من كروم الحياة
بدوخ فيكي عا قدر ما بتتعتقي
❤❤✌👌🏾
المشاركات
