.. ارحم ڜبابك يامسكين.. بقلم. خميس نصر

إرحم شبابك يا مسكين 

إرمي السيجارة اللي في إيدك

العند عمره ما هيفيدك

قوم نقّي صدرك ووريدك

وولادك أولى بالقرشين

داير تبعتر في فلوسك

وحيّة عمّالة تبوسك

تلف حواليك وتدوسك

سلّمت ليها بشكل مهين

حواليك ولادك بيكحو

والناس قصادك بيلّحو

ليه بس بحياتكو تضحوا؟

يا أخينا ما تبطلوا تدخين

سيب السجاير والجوزة

دي كلها ملهاش عوزة

في العلم والدين منبوذة

ارحم شبابك يا مسكين

طهّر حياتك م الدخان

لا احسن تجرّك للإدمان

وتعيش حياة كلها أحزان

تخسر حياة البني آدمين

عمرك ما هتلاقي الراحة

لو سبت نفسك بصراحة

تدبل وتفضل في مناحة

خُد القرار وبلاش تدخين

من قلبي وباقولها كفاية

دي صحتك عايزة حماية

وأسرتك صونها وصاية

خد القرار وبلاش تدخين

بقلم

خميس نصر