.. صلاه الغايب.. للشاعر.. اشرف الشناوي.

...........صلاة الغايب........

انا اخر حد بقابله 

فى ليلتى

وارسمنى واعلق 

صورتى يوماتى

على المسامير 

وبشد جراحى 

ومن جوايا 

وافرشها فى بحر

دموع بالليل 

مزامير

وامسك غربال 

احزانى واغربل 

واصلى صلاة الغايب 

عالاحلام  لا تطير

وافضل مستنى

عينيا تطب 

فانام تعذير

انا بين عفاريت 

بتلسوع فيا 

وبالكرابيج 

وحيطان بتمد

ايديها فتخطف فيا 

ترمينى فى قلب

جهنم حمرا 

مع الشياطين 

واستنى الصبح

يعدى عليا

فاميعديش 

واتمنى فى بكره واقوله

ياريت متجيش 

ماهو برضه ان جه

فازاى راح اعيش 

خلينى فى قلب

الكهف لحد ماحد

يأامن بيا 

او يطلع صبح 

يدق النور فى عينيا 

انا اخر حد

بقابله يوماتى  

يناكف فيا

نفضل ولحد الفجر  

مايرمى حبال النور 

صياد مستنى 

يشوف بس العصفور

وارجع من تانى 

فى حسبه

ماليها كسور  

انا اخر حد باشوفنى 

وعاوزنى اغور 

اشرف الشناوى

شاعر عاميه

المنصوره

البرامون