ليل الخلاعه
#
تعا وقفلك بجنبي ربع ساعه
حتّى خبرّك وين الفظاعه
الفظاعه بكون مبني عالخيانه
وجماعه عايشه بنعمة جماعه
#
تعا شوف الفظاعه من حمامه
بدل ما بطهرها تجيب العلامه
اختنق في صدرها صوت الشهامه
وفقع من عينها شلش الوداعه
#
الفظاعه بخاينه باعت أسدها
وبحقّو مونّت "أرنب جسدها"
لطبيقة "أختها" وغفوة "ولدها"
ديب الغدر بلّش بالرّضاعه
#
وصدفه عاد سبع الكان غايب
وعلى "شريكة حياتو" شوق دايب
وجد بيتو لأهل الليل سايب
بعد ما كان مستودع قناعه
#
دخل عا تنين كلّ الليل عاشو
بهنا ومن خمرة اللذّه تلاشو
اختفى اللي كان نايم عا فراشو
لكن ما اختفى ليل الخلاعه
#
صفن ربّ الأماني "بالأماني"
وجدها للمذّلي أسطوانه
وضمير الليل عا صوت الخياني
وقف مخجول من هيكي إذاعه
#
وبحر الكان خاضع للسّكينه
نقص من لجّتو درّه تمينه
وهاج الموج حطّملو السّفينه
وكفر في سمكتو "حوت المجاعه"
#
يا إخواني يا أهل الشّعر هاتو
فكرة تفهّمو عن واجباتو
بيحمل عار او بيقتل مراتو؟
او بالهجر او بالصّفح قولو
أيّا ناحيه فيها شجاعه؟
ليست هناك تعليقات:
إرسال تعليق