سيبوني
احب بلدي بطريقتي
احبها
بقلبي وعقلي وجنوني
سيبوني
اشاور علي الحلو فيها
وأنقد اللي جوعوني
سيبوني
وأوعوا تحاسبوني ولا تمنعوني
سيبوني
اشوف بلدي جنة
واعيش علي الارض فيها
سيبوني
وبلاش تجيبولي شيوخ الملايين
علشان بالفقر والجوع يقنعوني
وان الجنة هاشوفها
بعد ما اموت وتدفنوني
سيبوني
اشوفك يابلدي جنة
والعدل فيكي حنة
منقوش علي الكفوف
وأشوف الفرح في كل
بيت بالزمر والدفوف
دا الحزن خيم علي البيوت
والعنف زاد وخراب بيوت
ياناس ارحموني
سيبوني
لما امرض الاقي سرير
وزي الناس تعالجوني
سيبوني
نفسي افرح بالعيال
قبل ما تشيعوني
نفسي الاقي حتة
متر في متر فيها تدفنوني
نفسي ونفسي ونفسي
اشوفك يابلدي جنة
وايد حنينه تطبطب عليا
والثانية تمسح دمع عيوني
ياناس اعتقوني
سيبوني
بقلم
احمد محمود
18/1/2023.
0 التعليقات
المشاركات
