.. انا قلبي عيل.. للشاعر اشرف الشناوي

......انا قلبى عيل.......

بتعند وتنسى 

وانا قلبى شايلك 

وفوق الكفوف 

ياريت مره

تقدر تحس

اللى بيا 

وقلبك يشوف 

يشوف دق قلبى

وشوقى وحيرتى  

عليك والكسوف 

بلاش يعنى تبعد 

وتزرع جراحك 

وتملانى خوف 

وروحى اللى عاشقه 

حروفك بتنده 

عليك من بعيد 

واول ماشوفك 

باحس انى عيل

ومستنى عيد 

وبارسم فى صورتك 

وحافظ ملامحك 

بتبعد وترجع 

ولازم اسامحك 

برغم أن جرحك 

يفل الحديد 

بحبك وحبك 

بيكبر فى قلبى 

برغم الوجع 

وبانسى اللى قولته 

واطمن فى قلبى

واعيش فى الخدع 

واقول بكره ينسى 

ويرجع لى تانى 

ويطلع جدع 

تعدى كأنى مانيش 

جنب منك  

ولا حته منك 

وقلبى انخلع 

فليه قلبى حبك  

وسلم فى روحه 

وقلبك خلع ................

اشرف الشناوى

شاعر عاميه

المنصوره

البرامون