هديّه
#
يا ريت عندي وآخ لو فيّي
عا قدّ حبّي جبلك هديّه
كنت بهديكي شذا الوردات
وأسرار أحلام الطّفوليّه
وكنت بتعمشق على النّجمات
بسحب شلل خيطان فضيّه
وبكلّف ملايك وحوريات
تحيّكلك بلوزة ألوهيّه
وبالبحر كنت بغافل السّمكات
وبغطس متل فكر الحراميّه
وبقطف زبد من رغوة الموجات
ومن جدايل شمس مرخيّه
بكمش وهج وبحوّلو بوسات
بلون أشواقي المورديّه
ومن هون ببعتها مع النّسمات
لهونيك لعيونك خصوصيّه
والطّفل كنت بشلّحو البسمات
وبغرف من عيونو صفا نيّه
وعرس الرّبيع بشلّحو الغنجات
وكل شي معو لهتات عطريّه
وبكلخ من جفون السّحر دمعات
كلّها غيره وحنيّه
وبلفّها بعيون خمريات
وبروح حافي بسلّمك هيّي
ومن كلّ طير بنتّف الرّيشات
وبفلش طريقك ريش حريّه
وعالمروج بسابق النّحلات
بجبلك ضمير زهور بكريّه
بطير مع أحلام وخيالات
عا بلاد مدري وين مبنيّه
وبوجدلك من سوالف الغيمات
مرجوحتك عا كتاف جنيّه
وبغزلك شراشف من الهمسات
وفراش من قلب النعوميّه
وجودلي من السّحر ومخدّات
من شعر آلهة الفينيقيّه
وبرشّ عا جفونك هنا الغفوات
المحروم منها حظّ عينيّي
وخلّي الحلم يحكيلك حكايات
عن حالك لحالك غراميّه
هيهات لو عندي فعل هيهات
عا قدّ ما عندي أنانيّه
بحوّلك إنتي أنا بالذّات
وبلبّسك روحي الطّبيعيّه
لكن إذا فشلوا التّمنيات
وعمري إستسلم للعبوديّه
بترك إلك مني تلات كلمات
محبتي والآخ والنّهدات
من القلب هالبيحبك هديّه
.
❤💯👌🏾✌👌🏾
ليست هناك تعليقات:
إرسال تعليق