الحلو ف بلدنا.
عبدالله رجب ابوعدنان
الحلو ف بلدنا
ملاكنا زي شيطانا
واللي بيسرق أوطانا
نزيد ف احترامه ونركع قدامه
نفرح لافراحه
ونحزن لأحزانه
نعيط و نظيط ونتنطط
زي ما يكون الخوف مكهربنا
ارقص واتحزم
اضحك حتى وانت بتتالم
اوعى تتكلم
مقاسك عالي
حبيبي الغالي
ربنا يعزك مفردات مهزوزة
زي حجرين ع الجوزة
ونفس مقطوع
واكح والكحة
من بين الضلوع
وضحكة صفرة تستفزك
توصف أحوالنا
زي الخوف م البوكس
وكله هجص ف هجص
رص يا عسكري رص
وتتنفس هوا ما اقولكش
ثاني أكسيد الكربون
وف اديك كلبش
وف همك مسجون
ومخبر بلادنا ف اديه أحلامنا
متر ف متر
والوش منكسر
اللي يحلف واللي يدعي
واللي يسابق الزمن
ويلاقي مطرح ع البرش
واللي طول الوقت بيهرش
والسنين ما تتحسبش
يدوب نرسمها
شخابيط بالدم على حيطانا
ليست هناك تعليقات:
إرسال تعليق