سامي محفوظ حنا
جمهوريه مصر العربيه
محافظة المنوفية
صاحب ديوان ورقي (رسائل عاشق ) بالعامية المصرية
دار الرضا لطبع والنشر
شارك في معرض القاهرة الدولي للكتاب 2012/2011
*****
إسم الديوان كذبة كبيرة
الإهداء
إلى رئيس مجلس إدارة مجلة تحيا مصر للابداع الشاعر والأديب الراقي الاستاذ سمير شراويد والشاعرة الراقية الأستاذة ريان جادو ولجميع الكادر الإداري في هذا الصرح العظيم
الطير المذبوح... صفحه. 1..
بقلم سامي محفوظ حنا
على فرح حبيبتي عزموني
حلفوا يرقصوني
خفت تغلبني دموعي
وعيوني بالسر تبوح
قلبي يصرخ
جوايا وينوح
رقصت رقصة
الطير المذبوح
صقفوا لي
وأنا بطالع في الروح
بتنطط من ألم الجروح
خبيت بالفرحة وشي
وطاوتها على حزني
وكتمت جوايا
أنين الجروح
نفسي الساعة تجري
والوقت بالسرعة يعدي
أو تفارقني الروح
وفجأة الدنيا لفت بيه
وقعت على الأرض
جثة مرمية
وناس حواليا
تبكي وتنوح
قلت الحقوني بغرق
محتاج لسفينه نوح
قالوا مسكين بيخرف
كلها دقايق وتطلع الروح
فتحت عينيه
لقيت حبيبتي
عليه بتبكي وتنوح
ونجيتني من الغرق
سفينة نوح
صحيت من نومي
صوتي مبحوح
كان عدى ميعاد الفرح
والقدر منعني أروح
ورقصت رقصة
الطير المذبوح
بقلم سامي محفوظ حنا
صفحه. 2.
كذبة كبيرة
بقلم سامي محفوظ حنا
كذبة كبيرة
إسمها الحب الأولاني
سرق مني عمري
خد منى ولا إداني
ضاع مني من زمان
قفلت باب قلبي
وعذبته بالحرمان
وحافظت على عهدي
ومكان حبيبتي
زي ما كان
عشت على أمل
الصدفة يوم تجمعنا
ونتقابل ولقانا
يبقى له معنى
قابلتني
عينها في عيني
مش عارفاني
وقفت قدامها
أكلمها مش فاكراني
أنا بس اللي فاكرها
يمكن نسيت الضحكة
نسيت الفرحة
نسيت سنين
عددت من عمري
من غير ماعيشها
إلا حبيبتي
لسة فاكرها
تسريحة شعرها
وجمال ضفايرها
وضحكتها
اللي بترسم غمزتين
في خدودها
وبنظرتها شباكتني
وسحرتني بجمال عيونها
نسيت كل حاجة
إلا حبيبتي لسة فاكرها
كل حاجة
ما هي كل حاجة
هو أنا في حياتي غيرها
ذكريات عايش بيها وليها
ساكنة فيه و ساكن فيها
مش فاكر
من الماضي غيرها
والحاضر عايشه فيها
والأيام اللي جايه
مابفكرش فيها
أصل الزمن وقف
عند آخر مرة
كنا مع بعض فيها
كذبة صدقتها
وعشت فيها
إسمها الحب الأولاني
سرق مني عمري
خد مني ولا إداني
وأخرتها
عايش في زحمة
والوحدة قتلاني
بقلم سامي محفوظ حنا
صفحه. 3.
إنتهى دورك
بقلم سامي محفوظ حنا
إنتهى خلاص دورك
عودتيني على بعادك
مليت جنونك وعنادك
بلاش تكتري في أعذارك
مالوش لازمه إعتذارك
مابقاش مهم
في حياتي وجودك
أنت نهيتي دورك
مش راح أتخدع تاني
في نظرة الطيبه
اللي في عيونك
وقلبي اللي حولتيه
لحجر مش راح تقدر
عليه دموعك
خلاص إنتهى
في حياتي دورك
من يوم ما قررت
تبعدي وتنسى وعودك
وصورلك كبريائك وغرورك
إنك إله وأنا معبودك
إنتهى في حياتي دورك
بعد ما انكشف
كدبك وخداعك
ندمان على حب حبته لك
وعهد كنت بصونه لك
مستحيل اامن لك
واصدق من تاني عهودك
خلاص إتعلمت
منك الدرس
وقلبي إندهس دهس
لا عاديشعر ولا يحس
من كتر قسوتك
وجحودك
خلاص إنتهى
في حياتي دورك
لا أنت إله
ولا أنا معبودك
إنتهى دورك
بقلم سامي محفوظ حنا
ايه يعني
بقلم سامي محفوظ حنا
ايه يعني ما نتكلمش
ايه يعني ما نتقابلش
مين يمنع عيوننا
مع القمر ما تسهرش
مين يمنعنا ببعض
ما نحلمش
مين يتحكم في قلوبنا
مين يسكن فيها
ومين ما يسكنش
مين يمنع أرواحنا
ما تتقابلش
ولا فاكرين البعاد بنسي
وللقلوب بيقسي
البعاد على الحب
ما يقدرش
بالبعاد الشوق يزيد
ونار الحب تقيد
نار تعذب ما تحرقش
أيه يعني ما نتكلمش
أيه يعني ما نتقابلش
مين يمنعنا في بعض
منفكرش
ويمنع طيفي وطيفك
ما يخطرش
وقلوبنا في الحب ماتعش
هنعيش في دنيا أحلامنا
اللي بتجمعنا ما بتفرقش
القلوب اللي بتحب
مهما قاست ما تتغيرش
أيه يعني ما نتكلمش
أيه يعني ما نتقابلش
بقلم سامي محفوظ حنا
صفحه. 5.
هجرت عشك
بقلم سامي محفوظ حنا
يا طير يا اللي هجرت عشك
ليه تقسى وتبيع قلب حبك
القلب اللي ياما رواك حنان
وكان سكن ليك وأمان
هان عليك تعذبه بهجرك
لاخدعك يوم ولا غشك
مش راح ألومك ولا أعاتبك
ولا هقول لك مشتاق لك
مع ألف سلامة يا طيري
بكره تجرب عيشة غيري
وتشتاق ليوم من أيامي
ويوحشك دفى أحضاني
وسعادة وهنا فيها عيشتك
يا طير أرجع لعشك
بلاش تتمرد على عيشتك
قبل الكسر كبرياء وغرور
ليه حابب الضلمة وكاره النور
زي الخفاش بتلف وتدور
بكره يجي عليك الدور
راح ترجع خاطرك مكسور
مش راح يضمك غير عشك
بقلم سامي محفوظ حنا
بقلم سامي محفوظ حنا
هنت عليهم وهم مهانوش
شلتهم في عيوني
وغطتهم بالرموش
أخلصت لهم في حبي
وهم مقدروش
ياما شفت منهم
وعنيت من قسوتهم
ومهما بعدت عنهم
قلبي يحن ويشتاق لهم
وهم قاسيين ما بيرحموش
هنت عليهم
وهم مهانوش
اشتريتهم بالغالي
هجروني ونسيوني
وباعوني بحب تاني
وغيري في قلبهم
خد مكاني
شيلوني فوق احتمالي
لاقدرت أنساهم
ولا راحوا من بالي
أصلهم عزاز على قلبي
ما يتنسوش
هنت عليهم وهم مهانوش
بقلم سامي محفوظ حنا
كفاك قلبي
بقلم سامي محفوظ حنا
كفاك قلبي
هل تعشق العذاب
وتتلذذ بالداء
كيف تهوى من هوت
بك من السماء
ألا يكفيك
من طعنات وجروحا
عجزوا فيها الأطباء
لماذا قلبي
كل هذا العناء
كيف تتمرد علي
وتقدم لها
فروض الطاعة والولاء
أنت قلبي وليس قلبها
هل أصبحت عبدا لها
أين ما فيك
من شموخ وكبرياء
لماذا تقرع باب قلبها
تستجدي الحب
وأنت من تعطي بسخاء
كيف تصون العهد
لمن لا يعرف الوفاء
نحن عاشقين
وليس للمعشوق أذلاء
العشق عظمة وبهاء
والكل في مملكتة
من ينعم بالسعادة والهناء
ومن يعيش في بؤس وشقاء
كف قلبي عن هذا العناء
بقلم سامي محفوظ حنا
حطمت قلبي
بقلم سامي محفوظ حنا
تقولين أنني أصبحت
بلا قلب صدقتي
ولكن الفضل يرجع إليك
فقد تحطم قلبي
على يديك وانكسر قيدي
وهدمت أسوار سجني
وحررتيني من الأسر
ومن خداع كاد يقتلني
ووهما عشت فيه
سنين عمري
حبا آمنت به
كان يستعبدني
قادني إليه إحساس قلبي
اعتقدت أنه واهب الحياة
وقد خاب فيه معتقدي
بعد أن تحطم قلبي
عادني عقلي إلى رشدي
كيف يهب الحياة صنم
مدين لك بالفضل
يا من حطمت قلبي
وعدتي بي لعقلي
وخلصتني من حب
يأسرني ومشاعر
كانت نقطة ضعفي
وعادت لي حريتي
بعد أن أصبحت
بلا قلب صدقتي
بقلم سامي محفوظ حنا
خليكي صريحة
بقلم سامي محفوظ حنا
خليكي صريحة
وما تخبيش
قولي الحقيقة
وما تكدبيش
مهما كانت مرة
أهون الف مرة
ما تخليني
في الوهم أعيش
قولي أنك
ما بتحبنيش
وحبي ليك
من طرف واحد
عذاب ليا
ما ينتهيش
خليكي صريحة
ما تخبيش
ليه لما تبقي معايا
سرحانة في دنيا تانية
وعقلك مش معايا
وعينك فيها
مليون حكاية
وأسألك تقولي مفيش
خليكي صريحة ماتخبيش
ليه لما أغيب عنك
عني ما تسأليش
أنا أشتاق لك
وأنت متشتاقيش
أسهر الليل أفكر فيكي
بتمنى أسعدك وأرضيكي
ولو أطول نجوم السما
اهديها ليكي
وأنت فيه مبتفكريش
ليا حق أقول لك
ما بتحبنيش
وقلبك مع غيري
بيعيش
متزعليش مني
ومتلوميش
لما أقول لك
ابعدي عني
وسيبي لي قلبي
يمكن يحب تاني
ومن غيرك يقدر يعيش
بقلم سامي محفوظ حنا
الحلو ما يكملش
بقلم سامي محفوظ حنا
ليه الحلو ما يكملش
واللحظات الجميله
مابتدومش
كنت فاكر الحب
ما يموتش
والعشرة بين الحبايب
ما تهونش
آه يا زمن ما يتأمنش
الكل فيه خان
وجرح الخيانه
ما يطيبش
ما تلومش ولا تعاتبش
على اللي خان حبك
وماقدرش
ايه يفيد اللوم والعتاب
مع اللي كنا فاكرينهم
أحباب
قلوبهم اتحجرت
هانت عليهم العشرة
ونفوسهم اتغيرت
والغدر بقى طبعهم
والطبع ما بيتغيرش
عليهم يا قلبي
ما تبكيش
وعلى عشرتهم
ما تندمش
خسارة الدموع
في اللي خان
وللعهد ما صنش
انساه يا قلبي
وما تفكرش
افرح أنه راح
واتمنى ما يرجعش
الحلو ما يكملش
بقلم سامي محفوظ حنا
مشغول عليك
بقلم سامي محفوظ حنا
مشغول عليك طمني
عامل أيه في بعدك عني
يا شاغل بالي وفكري
بتمنالك كل خير يا قلبي
يا رب تكون سعيد متهني
صحيح بتألم لبعدك عني
والحزن غير ملامحي وطبعي
نفسي عليك حد يطمني
حاسس إنك مهموم
وهمك سبب حزني
إبعتلي و عليك طمني
ما تسبنيش لحيرتي
وعقلي يجيب ويودى
يا ساكن روحي وقلبي
بتمنى أشوفك في حلمي
الاقيك في الحلم بتهجرني
اصحى من نومي بدري
وقلبي لمكان ياخدني
كنت فيه زمان بتقأبلني
أقعد وأحس إنك جنبي
بكلمك وتكلمني
وهواك ينعش صدري
وبرويحك بتعطرني
الوقت معك بيجري
وأحس بيدك في يدي
ودموعي تنزل غصب عني
اودعك وتودعني
وتروح وتروح روحي مني
وبسرعة أصحى من حلمي
مشغول عليك ومين يطمني
بقلم سامي محفوظ حنا
جمهوريه مصر العربيه
صفحه. 12.
أمنية حياتي
بقلم سامي محفوظ حنا
أمنية حياتي أنساكي
وخرجك من قلبي
وأمحيكي من ذكرياتي
وأنهي قصة عذابي معاكي
لكن بيغلبني حبك
ويعذبني بعدك
ويشعل الشوق جوايا
ويخليني أشتاق لك
على طول فاكرك
ما بتتنسيش
وأنت مابترحميش
قاسية ما بتقدريش
كتير وعدتيني
وحلفتي وعاهدتيني
بوعدك ما بتوفيش
وللعهد ما صنتيش
وعدتيني بالجنة
وسبتيني في النار أعيش
بعد ما بقيتي كل حياتي
عذبتيني بالفراق
ومليتي بالمر كاساتي
ولما أرجع لذكرياتي
تزيد أوجاعي وأهاتي
بعد ما كنت أجمل أمنياتي
بقت أمنية حياتي أنساكي
وأخرجك من قلبي
وأمحيكي من ذكرياتي
بقلم سامي محفوظ حنا
صفحه. 13.
ما ليش إختيار
بقلم سامي محفوظ حنا
ما ليش في حبك إختيار
قلبي حبك
وهو صاحب القرار
عاوز تبعد عنه وتعذبه
والشوق ليك يدوبه
أبعد لأبعد حدود
وإنسى كمان الوعود
وخون العهود
وعالي في الأسوار
وإبني بيني وبينك
سدود
حبك راح يفضل
موجود
مش فضل مني
ولا عليك به بجود
ده غصب عني
ماليش في حبك إختيار
قلبي حبك
وهو صاحب القرار
لو كان لى إختيار
كنت زرعت
الحب في قلبك
و أشعلت شوقك ليا نار
وطيرت النوم من عينيك
وعذبتك بالإنتظار
وتشتكي من طول ليلك
وتشتاق لطلوع النهار
لو كان ليا إختيار
بعد اللي شفته منك
كنت بطلت أحبك
إنسى يوم فيه قابلتك
لا تخطر على بالي
ولا أشتاقلك
ولا أخد على خاطري منك
ولا يألمني جرحك
ولما أقابلك
أعمل نفسي مش عارفك
لو كان لى إختيار
لكن قلبي الي حبك
وهو صاحب القرار
بقلم سامي محفوظ حنا
صفحه. 14.
لحظة وداعنا
بقلم سامي محفوظ حنا
أصعب لحظة في حياتنا
كانت لحظة وداعنا
الخرس صاب لسانا
والشفايف سجنت كلامنا
دوسنا على مشاعرنا
إتغلبت علينا دموعنا
وعصر الألم قلوبنا
وصرخة الصمت
حطمت ضلوعنا
زلزال هز كيانا
إنهارت معاه أحلامنا
ولا شيء يسكن وجعنا
بعد فراق حبايبنا
فقدنا المعنى لوجودنا
سكن الحزن قلوبنا
تاهت بنا خطاوينا
في طريق غير طريقنا
مجهول فيه مصيرنا
بيتحكم فينا قدرنا
وزمن كتر فيه مرارنا
بذكرى الفراق يعذبنا
بأصعب لحظة يفكرنا
لحظة وداعنا
بقلم سامي محفوظ حنا
(إحترت في أمرك)
بقلم سامي محفوظ حنا
في أمرك أنا محتار
بعدك عذاب وقربك نار
مش عارف أخد قرار
ما سبتش ليا أي إختيار
مافيش غير العذاب والنار
والإتنين كاس مليان مرار
والحلم أصبح كابوس
ياخد روحي في عز النهار
شايفك بتضيع مني
و حلم عمري بينهار
وبحر غرامك بيغرقني
بصارع الموج ويصارعني
وعوم ضد التيار
كنت فكرك ليا مرسى
أجري عليه علشان أرسى
أتاريك دوامة مالهاش قرار
كلك طلاسم وأسرار
حيرت الجن والسحار
والعلماء أصحاب الأسفار
العقول أصابها ذهول
وتاهت معاك الأفكار
قالوا ما لناش خيار
كله مكتوب حسب الأقدار
حراسك جن من النار
عاملين حواليك أسوار
اللي يقرب يتحرق بالنار
واللي يبعد عنك حياته مرار
بكل صراحةإحترت في أمرك
مش عارف أخد قرار
بعدك عذاب وقربك نار
بقلم سامي محفوظ حنا
حلم جميل
بقلم سامي محفوظ حنا
حلم جميل
صحيت منه وودعته
و إخترت الواقع
مع إنه مرير وعشته
أحسن من وهم
ضيع عمري وصدقته
وسراب خدعني
ضحكت على نفسي
وقلت إمتلكته
يوم ما حبيتك
وحبك جوايا سكنته
وإفتكرت إني سجنتك
في قلبي وسجنته
و أتاري حبك هو السجن
سجنت نفسي فيه
وعشقته
إتملك مني وإمتلكني
ولاامتلكته
عشقت عذابه
واستطعمت مرارته
حبيت أيامه
وعشت فيه العمر كله
ولا تمنيت أخرج منه
ودوبت في غرامه
وأموت لو بعدت عنه
حلم جميل
كدب عليه وصدقته
لما قال إنك معايا
وأنا لوحدي عشته
ساعتها حسيت
بطعم مرارته
وكأنه كابوس
وبهرب منه
وإنت قدامي
وشايفك بعنيه
بترقص فرحان
وشمتان فيه
وتقول تستاهل
عشان تحلم بيه
صدقت إني بحبك
وعشت أحلام ورديه
كرهت الحلم
وندمان إني عيشته
صحيت منه وودعته
وهاعيش الواقع
بحلوته ومرارته
وكفايه العمر
اللي ضيعته
بقلم سامي
صفحه. 16.
لو بإيدينا
بقلم سامي محفوظ حنا
لو بإيدينا كنا نسينا
لا تعذبنا ولا قسينا
ولجراحنا كنا داوينا
لا ندمنا ولاصعب علينا
من حبايبنا
واللي عملوه فينا
كنا دوسنا على قلوبنا
وعلى الصعب عدينا
ولا كان الحب
يتحكم فينا
ولا قدرنا لعب بينا
والزمان ضحك علينا
وسرق مننا عمرنا
وخد أحلى ما فينا
لو كان بإيدينا
لكن مكتوب ومتقدر
ومين يا ناس
على الحب يقدر
ياماسهر عاشقين
ليالي تفكر
سقاهم المر كاسات
ويقولوا شهد مكرر
وللعذاب يشتاقوا
أكتر وأكتر
ملك على القلوب
يأمر ويتآمر
ويتحكم فينا
وحسب هواه
ترسى مراسينا
ولا شيء عاد بإيدينا
لو بإيدينا
بقلم سامي محفوظ حنا
صدقني
بقلم سامي محفوظ حنا
صدقني ما تمنيتش
في الدنيا غيرك
عمري ما اتصورت
تكون لغيري
وأكون لغيرك
اتمنيت أكون
سجين حضنك
أنعم بالجنة
وأنا في قربك
لكن القدر
كواني بنار بعدك
متصورش حالي بعدك
بموت مع كل خطوة
تبعدني عنك
وترجع روح ليا
لما اسمع سيرتك
أو حد ينطق
قدامي أسمك
اتاريني عايش
على نبض قلبك
كل ما بعدت
بينا المسافات
قلبي وروحي
يقربوا منك
كأنك ساكن جوايا
وانا ساكن جواك
وبعد المسافات
لاعاد يفرق
معايا ولا معاك
بقلم سامي محفوظ حنا
صفحه. 18.
ليه تبعديني
بقلم سامي محفوظ حنا
ليه عنك تبعديني
عذبني شوقي ليك وحنيني
الشمس تغيب لما تغيبي
والقمر حالف ما ينور ليلي
الحزن سكن قلبي
والدموع ما فرقة عيني
العمر بيجري
وتسرقت مني سنيني
كنت الشهد اللي بيرويني
بعدك الزمن من المر بيسقيني
ياحب ماشي في وريدي
يا نبض قلبي اللي بيحيني
ليه منك تحرميني
وكل ما أقرب تبعديني
وكل شيء جواكي بيناديني
ولو غبت عنك
بوحشك وتشتاقي لي
ولما أقرب منك
تقولي كلام من وراء قلبك
أنك خلاص نسيتيني
تقصدي عنك تبعديني
الحب بيناديك ويناديني
بشوفه في عينيك
لما تقابليني
وأيديك في أيديه
حضن يدفيني
ودموعك تمنعيها
وأنت بتودعيني
كل ده بيقول
إنك بتحبيني
صحيح عمرك ما قولتيها
لكن قلبك بيقولها
وأنت رافضه تسمعيها
ليه تعذبي نفسك وتعذبيني
ليه عنك تبعديني
بقلم سامي محفوظ حنا
صفحه. 18.
خساره
بقلم سامي محفوظ حنا
خساره فيك اللوم
خساره فيك العتاب
خسارة كنت في يوم
ليا من الأحباب
فيك أنا مصدوم
ماعرفش أنك كذاب
تشكي وتقول مظلوم
غصب عني كان الغياب
وبعدها بكام يوم
ترجع تبعد من غير أسباب
شيلت قلبي هموم
وعيشتني ليالي عذاب
أسهر أعد النجوم
مستني تدق الباب
طار من عيني النوم
في إنتظار رجوع الأحباب
ويوم ورى يوم
تعود قلبي الغياب
وحبك مش هيدوم
كأنك حلم كأنك سراب
لاعرفتك في يوم
ولا كنا لحظة أحباب
خساره فيك اللوم
خساره فيك العتاب
بقلم سامي محفوظ حنا
راجع ليه
بقلم سامي محفوظ حنا
راجع ليه
كنت نسيتك
ما عدتش جوايا
شيء اديهولك
لا حب ولا كلام
حلو أسمعهو لك
راجع ليه
كل شيء جوايا مات
راجع عشمان
من تاني تصحيه
شيء لا أنا ولا أنت
نقدر عليه
راجع ليه
الوقت فات
والقلب من زمان مات
لاعمره سمع كلمه حلوه
ولا ليله في الفرح بات
قتلته مرارة الذكريات
وإذا كان على الحب
اللي بتتكلم عليه
خلاص القلب مات
وإزاي يحس بيه
ولا فاكر الحب
بيعمل معجزات
راح يحيى القلب
و يصحيه
ده كلام خيال
وروايات
والحقيقه لا أنا
ولا أنت نقدر عليه
راجع ليه
جيت متأخر
كلامك لا راح
يقدم ولا يأخر
ولا يحنن قلبي
عليك ولا يأثر
كلامك عذاب ليه
وليك مش أكتر
بلاش في الماضي
أنا وأنت نفكر
فراقنا مكتوب
علينا ومتقدر
ونصيبنا رضينا بيه
راجع ليه
بقلم سامي محفوظ حنا
صفحه. 20
إحلمي
بقلم سامي محفوظ حنا
إحلمي وإسرحي بخيالك
ووصلي للسما بأحلامك
ما تحلميش بالرجوع
ولا يخطر يوم في بالك
رجوعي أبعد من خيالك
وأصعب حلم في أحلامك
سنين العمر ضاعت
وأنا قدامك
قلبي تعب من الدق
على بابك
طالب عطفك وإحسانك
خليتك ملكة على قلبي
عاملتني واحد من خدامك
ماصنتيش القلب اللي صانك
ولا خطرت يوم على بالك
ولا حسيت لحظة بإهتمامك
بعد فوات الأوان فتحت بابك
وقطار العمر عدى
وخلاص فات ميعادك
وغيرك في قلبي خد مكانك
كان شايلني في قلبه
وعميني عنه غرامك
رمم جوايا حيطامك
وشفى قلبي من جراحك
وخلى حياتي بستان ورود
بعد ما شال منها أشواكك
إبعدي عني وعيشي حياتك
إحلامي وإسرحي بخيالك
ووصلي للسما بأحلامك
ما تحلميش بالرجوع
ولا يخطر يوم في بالك
بقلم سامي محفوظ حنا
صفحه. 21.
الغلط مردود
بقلم سامي محفوظ حنا
الغلط مردود
غلطت والغلط مردود
غلطت والغلطةمش راح تعود
مش كان فيه بينا وعود
وقلت لي راح استناك لما تعود
مهما غبت وغيابك طال
مكانك في القلب هيفضل موجود
ورجعت لك بشوق ما له حدود
لقيتك ناسي وقلبك قاسي
وقابلتني بكل جحود
ما كنتش أعرف إنك كداب
وكدبك ما لوش حدود
غلطت والغلطةمش راح تعود
ما كنتش فاكرك بياع
وكلامك ليا كله خداع
عشت العمر باحلم بيك
ومشيت معاك مشوار
أوله عذاب وأخرته ضياع
يوم ماهجرتني ولوحدي سبتني
وستخسرت فيه كلمة وداع
وعملت بيني وبينك حدود
غلطت والغلط مردود
دى أنت كنت الحياة وكنت الوجود
والربيع اللي بجدد عمري
وشم فيه عبير الورود
راح فين الحب راحت فين الوعود
كل ده اتنسى مبقاش في قلبك
غير الجحود
غلطت والغلط مردود
غلطة مش راح تعود
بقلم سامي محفوظ حنا
بقلم/سامي محفوظ حنا
إحساس جوايا
إحساس جوايا
مشلاقي له تفسير
فجأة بطلت عليك أغير
لما كنت بتغيب
الشمس معاك بتغيب
وفي الكون
يحصل تغيير
دلوقت غيابك
بقى زي حضورك
ملوش تأثير
دى أنا لما كنت
أسمع إسمك
من الفرحة
كنت بطير
إحساس جوايا
مشلاقي له تفسير
يمكن بعدك عني
كان له تأثير
ومن قسوتك
على قلبي
حصل له تغيير
اي حد يسكن فيه
من غير تفكير
ولو خرج عادي
مالوش تأثير
وكأن بابه مكتوب
عليه للتأجير
إحساس جوايا
مشلاقي له تفسير
بصراحه قلبي
من ناحيتك إتغير
وإحساسي بيك
بقى حاجه تحير
ماعدتش مشغول
بيك ولافيك بفكر
يمكن علشان حبيتك
وإنت ما كنتش بتقدر
مات جوايا حبك الكبير
بإهمالك وعدم التقدير
إحساس جوايا
مشلاقي له تفسير
بقلم /سامي محفوظ حنا
كنت حاسس
بقلم سامي محفوظ حنا
كنت حاسس
راح يجي يوم
لقانا مش هيدوم
الفراق قدر مكتوب
علينا و محسوم
وفي عز فرحتي وأنا وياك
كنت حزين وقلبي مهموم
خايف لا يجي يوم
تغيبي والسماء الصافيه
تغطيها الغيوم
ويحجب القمر نوره
ومعاه النجوم
ونتوه في طريق المجهول
طريق كله ظلام مشئوم
وأحزان وجراح وهموم
والفرح فيه غير معلوم
كنت حاسس لقانا
مش راح يدوم
كنت حاسس
على قد فرحنا
راح تكون أوجعنا
ويزيد من حزننا فراقنا
وتجرح الخدود دموعنا
ومن كثر الدموع
يسكن الظلام عيونا
بعد ما إتحرقت
ودابت شموعنا
ويحتاريشكي لمين
قلبي المكلوم
ويعاتب مين ويلوم
على الزمن
ولا حكم القدر المحسوم
بقلم سامي محفوظ حنا
صفحه. 24
بعدك عني
بقلم سامي محفوظ حنا
بعدك عني
مش راح يكسرني
ماخبيش عليك
حسيت بضعفي
ودمعة في السر
غالبتني
أصل حبك كان
ماشي في دمي
وخروجه من قلبي
مش بالساهل عندي
وأكيد راح يألمني
أصلك كنت حته مني
بس الألم
مش راح يحطمني
راح أطبطب
على نفسي
وواسي قلبي
وداوي بيدي جرحي
ومن صدمتي
راح أقوم مجبور
معلش كان نفسك
تشوفيني مكسور
ودموعي عشانك
تنزل بحور
وأرجعلك وأركعلك
وأستعطف قلبك
يا بدر البدور
لو كنت روحي
راح أقولك روحي
ومن غيرك أموت أموت
ولا عيش ذليل مقهور
كرامتي أغلى ما عندي
بعدك عني
مش راح يكسرني
بقلم سامي محفوظ حنا
https://samirnageeb85.blogspot.com/2023/04/blog-post_798.html?m=1
لسه بتكابر
بقلم سامي محفوظ حنا
لسه بتعاند وتكابر
وتقول إنك
على الحب قادر
وأنت في بحر الغرام
غرقان وبتعافر
على طول
عقلك مشغول
ومع اللي شاغلك
قلبك مسافر
لساك بتعاند وتكابر
كان اللي قبلك
بقى شاطر
قيس جاله جنان
وروميو إنتحر
في الآخر
الحب بحر
كله مخاطر
مهما كنت
سباح ماهر وشاطر
مش راح
تعرف له مرسى
ولا توصل فيه للآخر
أصل الحب قادر وجبار
ما بيسبش لنا إختيار
هو صاحب القرار
غصب عنك
راح تمشي مع التيار
وتسلم نفسك للأقدار
وليلك مش راح
يكون له أخر
لما العقل يغيب
لغياب الحبيب
والقلب على طول
معاه مسافر
أوعاك تقول إنك شاطر
دى قدر ومكتوب
ولو الحب خبط
على القلوب
لازم تفتح له وتخاطر
وإنت ونصيبك
يا تعيش متهني
مع حبيبك
يا تعيش في عذاب
ماكانش على البال خاطر
بلاش تعاند وتكابر
الحب جبار وقادر
بقلم سامي محفوظ حنا
عايش على ذكراه
بقلم/سامي محفوظ حنا
عايش على ذكراه
رغم العذاب
اللي شفته معاه
والجراح وظلم
قلبه وقساه
لسه قلبي بيدق
وحزنه جواه
رافض يموت
عايش على ذكراه
عشق مرارة عذابه
فاكره ورافض ينساه
لسه عنده أمل
ورغبه فى الحياة
رغم موت الفرحة
والضحكه جواه
وطول الليل
وعذابه وقساه
عارف فيه نهار
سهران بيستناه
ودقاته زي العزف
على الطبول
فرحانه منتظرة
لحظة لقاه
لقى الحبيب
اللي عاش
سنين العمر
على ذكراه
يرجع وترجع
الفرحة معاه
وتعود من تاني
له الحياة
وهم كبير
عايش جواه
وأمل كداب
والإسم حياة
زي مريض الإنعاش
نفسه مش من جواه
رافض يموت
متمسك بالحياه
بيحلم عنده أمل
العمر يستناه
وعايش على ذكراه
بقلم/سامي محفوظ حنا
بقلم سامي محفوظ حنا
فوق من حلمك
ما خلاص ضاع منك
ليه عايش في الوهم
و مصدق نفسك
و فاكر إنك شاغله
ولسه بيحبك
وماعرفش حد تاني
قلبه بعدك
يا عم فوق بقى
من وهمك
دى عايش حياته
ونسي كمان إسمك
ما تقوليش
وعده ووعدك
دى قلبه مات من زمان
ومات معاه حبك
وأنت عايش في الماضي
بتتعذب ومعذب قلبك
صدقني ده مش حب
ده وهم بيسرق عمرك
طيب قولي
ايه أخرة حبك
وأنك لسه ماحافظ
على عهدك
أوعى تقول لي
راح يرجع لك
ندمان ومش قادر
على بعدك
بأمارة ايه يرجع لك
وحشته في يوم
ولا أشتاق لك
ولا غلط مرة
وقال لك باحبك
ولا بعتلك وقالك
نفسي أقابلك
ليه عايش في الوهم
وبتخدع نفسك
ليه رافض تصدق
انه ضاع منك
لوتصدق إن الزمان
يرجع صدق كمان
إنه يرجع لك
فوق من حلمك
خلاص ضاع منك
بقلم سامي محفوظ حنا
راجع ليه
بقلم سامي محفوظ حنا
راجع ليه
كنت نسيتك
ما عنديش
شيء اديهولك
لا حب ولا كلام
حلو أسمعهو لك
راجع ليه
كل شيء جوايا مات
راجع علشان
من تاني تصحيه ده
شيء لا أنا ولا أنت
نقدر عليه
راجع ليه
الوقت فات
والقلب من زمان مات
لاعمره سمع كلمه حلوه
ولا ليله في الفرح بات
قتلته مرارة الذكريات
وإذا كان على الحب
اللي بتتكلم عليه
خلاص القلب مات
وإزاي يحس بيه
ولا فاكر الحب
بيعمل معجزات
راح يحيى القلب
و يصحيه
ده كلام خيال
وروايات
والحقيقه لا أنا
ولا أنت نقدر عليه
راجع ليه
جيت متأخر
كلامك لا راح
يقدم ولا يأخر
ولا يحنن قلبي
عليك ولا يأثر
كلامك عذاب ليه
وليك مش أكتر
بلاش في الماضي
أنا وأنت نفكر
فراقنا مكتوب
علينا ومتقدر
ونصيبنا رضينا بيه
راجع ليه
بقلم سامي محفوظ حنا
بعدك
بقلم/سامي محفوظ حنا
بعدك
بعدك حياتي ايه
و هاعيش لمين وليه
أنت عارف كنت
بالنسبه لي ايه
كنت نبض قلبي
اللي عايش بيه
بعدك حياتي ايه
و هاعيش لمين وليه
أنا كنت عايش
بيك وبهواك
كنت عايش جوايا
وأنا عايش جواك
كنت بتنفس هواك
وسعادتي كلها
وأنا وياك
يا أجمل حلم
محققتوش
وأمل حياتي
موصلتلوش
وطريق بدأته معاك
ومكملتوش
يا أجمل حب معاك
معشتوش
كل حاجه فكرت فيها
كل حاجه حلمت بيها
كنت انت معايا فيها
كنت دنيتي
وأنت أجمل ما فيها
بعدك فاضل ايه
هاعيش لمين وليه
حياتي من غيرك
تسوى ايه
بقلم سامي محفوظ حنا
وحشتيني
بقلم سامي محفوظ حنا
وحشتيني يا روح قلبي
وحشتيني ياضي عيني
يا شمس نهاري
يا قمر ليلي
في بعدك
يا عذابي وياويلي
من مرارة انتظاري
لطلوع نهاري
وطول ليلي
وحشتيني ياضي عيني
إرجعيلي فرحيني
نسيني حزني وأنيني
عوضيني على
اللي فات من سنيني
وعن شوقي ليك
وحنيني
من حبك وحنانك
إرويني
ومن خمر شفايفك
إسكريني
خلي حضنك يدفيني
وأسكني جوه قلبي
وفي قلبك سكنينى
وحشتيني يا روح قلبي
ياضي عيني
إرجعي ورجعي
عمري اللي راح
إشفيني وطيبي
الجراح
قلبي في بعدك
لا إتهنا يوم ولا
إرتاح
عايش تايهه
في الدروب سواح
ببدور عليك
يمكن يلاقيكي
ويلاقيني
وحشتيني ياضي عيني
بقلم سامي محفوظ حنا
يا اللي بعدت
بقلم سامي محفوظ حنا
يا اللي بعدت عني
وبتحاول تنساني
أعمل إيه في حبك
اللي مسهرني ليالي
قدام عينيه صورتك
ما بتفارقش خيالي
أمنيه حياتي
أشوفك ولو
في أحلامي
حيرت عقلي
وتوهت أفكاري
وقلبي راح معاك
ولا رجعليش تاني
يا اللي بعدت عني
وبتحاول تنساني
إيه بس ذنبي
قولي يا غالي
إيه اللي حصل مني
خلاك تبعد عني
وتعذب حالي
عمرك ما كنت
قاسى وأنانى
إزاي هان
عليك قلبي
وتكون على
الحب جاني
دى الحب مرة
ما بيتكررش تاني
والفرقه مره
أرحم حالك وحالي
يا اللي بعدت عني
وبتحاول تنساني
بقلم سامي محفوظ حنا
على كوبري قصر النيل
بقلم سامي محفوظ حنا
على كوبري قصر النيل
قابلتها
اللي قلبي عشقها
وحبها
الهواء بيعاكسها
ويداعب شعرها
قربت منها مدت
أيديها
وسلمت عليها
غلبت دموعها
عينيها
جيت أمسحها
قالت لي سيبها
دي صاحبتي
وتعودت عليها
من يوم ماسبتيني
بتواسيني في وحدتي
وهمي كله بغسله بيها
وهي النهارده بتشاركني
فرحتي اللي ياما
إشتقت ليها
لحظة لقاك اللي
حلمت بيها
نسيت فيها قساك
ومرارة الإنتظار
اللي عيشتني فيها
أول مرة أحس
بالسعادة فيها
ياريت تطول
ونعيش الباقي
من العمر فيها
كل ده وايدي
في أيديها
خايف تروح مني
وأرجع أدور عليها
اللي قلبي عشقها
وحبها
على كوبري قصر النيل
قابلتها
سامي محفوظ حنا
بعتني
بقلم سامي محفوظ حنا
بعتني ليه وأنا شاريك
دى الحب كله كان ليك
كنت دائما بخاف عليك
مهتم بيك وراعيك
عمري ما جرحت فيك
ولا يوم آسيت عليك
ولا هانت عليه
دموع عينيك
ليه رخصت عندك
وهنت عليك
كنت دائما بفكر فيك
كنت عايش
علشان أسعدك وأرضيك
وتبقى غلطان
وحق نفسي ليك
بخاف على مشاعرك
وأحس بنبض قلبك
وأعرفك من نظرة عينيك
كل ده ما طمرش فيك
كنت حاسس إني عارفك
أكتر ما أنت عارف نفسك
كدب عليه إحساسي بيك
كدبت عليه نظرة
الطيبه اللي في عينيك
إتخدعت فيك
يا خسارة حبي ليك
أنا مش ندمان عليك
ندمان على عمر
عشته مخدوع فيك
كنت فيه بايعني و أنا شاريك
بقلم سامي محفوظ حنا
حبي ليك
بقلم سامي محفوظ حنا
حبي ليك
صورك ليا ملاك
عشقتك الروح
والقلب إتمناك
والعين إشتاقت
لرؤياك
وقبل ميعادك بالساعات
كنت بستناك
ويعدي اليوم
في ثانيه وأنا وياك
إتعلقت بيك
وقلبي داب في هواك
حبي ليك
صورك ليا ملاك
غمضت عيوني
ومشيت وراك
وكتير منك حزروني
ما سمعتش
غير صوت نداك
وقلت غيرانين منك
وبيتمنوا
يوصلوا لسماك
مستكترين
عليه حبك
وبيحسدوني
وأنا وياك
كنت فاكرهم
دايبين في هواك
وأتاريهم قبل مني
كانوا ضحاياك
حبي ليك
صورك لي ملاك
مشيت طريق
العمر وياك
وأنا فاكره طريق
جنتي معاك
وهو طريق هلاك
خدعتني صورة
وشك الملاك
وكان شيطانك
ساكن جواك
طرت ببه
لأعلى سماك
ورمتني في
جحيم الهلاك
نار حبك
اللي مبتنطفيش
لابتموتني
ولابتخليني أعيش
ولا قادر كمان أنساك
حبي ليك
صورك ليا ملاك
بقلم سامي محفوظ حنا
جمهوريه مصر العربيه
المشاركات
