دنيا
****
يا ما دقيت على بابك يادنيا
ياما سنين دقيت
لا يوم فتحتي لي بابك يادنيا
ولا سبتيني مشيت
وقعدت اشوف حالي يادنيا
واما شوفته بكيت
آه منك يادنيا
آه وألف آه
ع اللي قسيته منك
واللي شوفته آه
آه منك يادنيا
لما بتقلبي في ثانية
على خوانا بتاخدينا
ضحايا وأنتي الجانية
وآه منك يادنيا
الشعر في رأسي شاب
من كتر ما شاف عذاب
غريب وسط الأحباب
مستني تحني عليا
دا أنا ماشي جنب الحيط
راضي بقوتي البسيط
جوايا جرح غويط
علم يادنيا فيا
في الصبر بقيت أيوب
من صبري على المكتوب
عمري ما قولت هروب
ولا أشتكيت من القسيه
غرقان في بحر هموم
وعيوني مخاصمها النوم
وسمايا ضباب وغيوم
والفرح بعيد عليا
بصبر روحي بروحي
عمال اطيب جروحي
وأنتى بتيجي وتروحي
في جروحي تزيدي شويه
قبل الأوان عجزت
كبرت وشخت وشبت
وعُمري من جرحي ما طبت
ودايماً دايسه عليا
فين أحلامي مخبياها
ونشوة أيامي فين
ضحكتي مني سرقاها
من يومي وأنا حزين
أنا كنت عملتلك إيه
ايه اللي بيني وبينك
مبتكملش سعادتي ليه
والا انتي اتعمى عينك
والا الحكايه أيه
بختي المايل معاكي
أمتىٰ بس هيتعدل
العمر راح بلاش
وانتي عايشه في السُطل
ويوم ما اشكيلك حالي
تزدادي لي في الهطل
أخرتها معاكي ايه
يا ستي أنا مش بطل
هفضل لحد أمتىٰ
يا دنيا أقول الآه
متعبتيش من تعبك ليا
مزهقتيش منك لله
آه منك يادنيا
آه وألف آه
قلبي غضبان عليكي
واشتكاكي لله
مليش حيله معاكي
غير حسبي الله
في اللي دوقتهُ على ايديكي
يا شيخه منك لله...
الشاعر السيد حسن....
المشاركات
