*** اشمعنا أخ ***
أخ لفظ الألم لما يطلع وقت الشجن
واشمعنا هو اللي نقوله عند المحن
من غير ما تدرى تلاقي اسمه بتنطقه
ومن غيره هو كأنك عود صابه الوهن
تنده عليه في أي وقت وفين يكون
تلاقي كتف جامد يسندك وصدر حنون
وإيد تطيب الجروح وقت الشقى
ومهما عملت فيه لا يمكن راح تهون
كلمة قالوها أجدادنا من زمان
هو ضهرك وعزوتك في أي مكان
أوعاك في يوم تبيع مودته
لتميل عليك الليالي وتسقيك الهوان
فكبرنا وجوه منا حب خالص للأخوة
حب من غير هناخد إيه يزيدنا مروه
وإزاي نضحي بعمرنا علشان أخونا
ويبقى شمس تنور حياتنا وتدينا قوة
بس جوا مني فيه سؤال بيتسئل
هو هابيل بأيد قابيل مش أتقتل
ودم يوسف ع القميص شاهد أجل
بأن أخوة نسوا الإخوة والضمير ارتحل
والزمان دا خد كتير من غير أي كسوف
أخ واكل حق أخوه ومفيش معروف
والتاني في خير وسايب شقيقه ملهوف
ودا يقتل أخوه عشان طين من غير شفقة وخوف
يبقى ليه بنقول أخ وقت الشجن
يمكن تكون هي النفوس اللي صايبها العفن
والأخوة كان شعار مات خلاص واندفن
وكفاية علينا حب الدنيا وتكون هي الكفن
***********************
بقلم / مصطفى كرم
المشاركات
