سؤال وجواب
بقلمى عزه السعدنى
وسألت نفسي بكلمتين.
أنا أبقى مين؟
ردت عليا من زمن
إنت الحزين
إنت إللى مكتوب عليك
الفرح بعيد عنك سنين
إنت اللي معرفش إيه
غير إنك واحد م البشر
المجروحين
إنت قصائد مهملة
من غير قوافى مترتبة
إنت السطور مستنزفة
مكتوبة بدم م الوريد
إنت عيونى السهرنين
إنت أشجار الصفصاف
على شط البحور مميلين
شاهد على غدر الزمن
بقلوب كانت مليانة بحنين
وصفك ماجانى ف الكتب
ولا شوفته بقلبى السجين
سجين طباع متغيرة
ونفوس كانت طيبة
واتحولت صبحت مليانة بأنين
إنت شفايف من خمور السكرانين
إنت حاجات متأجلة
طب قولى هتتأجل لفين
إنت مجنون من أفعال البشر
راكب قطار الملحمة
شاجب معالم الحياة
راسم على وشك غضب
طب بعد دا بتسألنى مين؟
إنت مش كنت الأمل
لقلوب كات مستنية الفرح
كنت سطور ومنورة
ضحكة ف ليلة مضلمة
كنت السعادة ف سطر الكتاب
ما تقولى ليه الكل غاب
ليه الحب يتحول سراب
وليه عينك يجافيها النوم
وتعيش كما الخفافيش
بضلمة وحياتك معتمة
عزه موسى السعدنى مصر
ليست هناك تعليقات:
إرسال تعليق