دكان عطار ( 547 )
..............
حدش جاله وقت إحتار
عاش عمر كأنه فى نار
تايه بين قلبه وعقله نسى نفسه
سنين ما أختار
بيزورنا نصيب والتاني
يهرب ما يخطي الدار
وبقالي كثير على الحال ده
مرهونه لمين يختار
وصفولي الصبر دوايه
وبخور كنسه عطار
أسأل فى الناس وأدور
مين شاف دكان عطار
كم من عطار وسألته
قالوا طلبك عند الجار
موصوف من الصبر وقيه
متحلي ما فيهش مرار
وترد لي قلب فقدته من
خوفه هرب من الدار
كام كلمه ونظرة همس لي
سعدك جابك وإختار
تقبلي وتكوني نصيبي
زوجه لراجل عطار
وشريكه مشوار باقي
قدرك فرح وأنوار
معقوله الأقي نصيبي
على باب دكان عطار
وأهرب من كلمه عانس
وأتباهى أنا ست الدار
بقلم .. صبري رسلان
0 التعليقات
المشاركات
