صرخة جريح
**********
صرخة جريح
بيعافر قصاد الريح
لا الدنيا بترحم
ولا القلوب بترحم
ولا الزمان بيرحم
ومين يسمع لجريح
صرخة جريح
الناس ولا السكارى
من الأحزان تايهين
والدنيا الجباره
سرقتنا في غمضة عين
فيها الجريح
بيتعكز على جريح
صرخة جريح
ايام بتلف بينا
زي السواقي بندور
لا رويتنا امانينا
ولا شُفنا طاقة نور
وآدي الأفراح بتتعزز
على المجاريح
صرخة جريح
صرخة جريح بيترجى
عطف الأيام
شوية رحمة من الأسى
ومن الآلآم
يدوق مره واحده
طعم التفاريح
صرخة جريح
أنا واثق دوام الحال
من المحال
وان اللي جي اكيد
هيبقى عال العال
وان الأمل في قلوبنا
سما صافية ومصابيح
صرخة جريح
يعاند بكره ما يعاند
براحته
ولو قادر يروح ميجيش
مهما تطول الليالي
جي النهار وفيه
هنعيش
هنكون قد الحياة
لو مليانة معاناة
هندوس على أي آه
ونملاها تسابيح
صرخة جريح
الشاعر السيد حسن.....
ليست هناك تعليقات:
إرسال تعليق