،، صوت السواقي،، بقلم،، محمد عزام

صـوت السواقي

(1)

 يا امايا

عودى الأخضر

نادى حشيش الأرض

لم العرض...

أدى الفرض..

وجه جبهتك .. لله

يا امايا ...

تمثال الحرية .. اتكلم

هز الصنم اللى واقف من سنين

من سنين ..

وأنا شايفه الآمر الناهى

الحاكم بأمره .. لكنه تاه

يا أمايا ..

دم الشباب روى الغيطان

نور أرضنا العدم

مع نور الفجر

مع شمس الحقيقه

مع غروب الكدب

اشتد الساعد لمنتهاه

يا امايا ..

ماعدش فيه إقطاع

أو صك كدب

أو وعد زور

أو .. أو .. أو

كل ده لازم ننساه

يا امايا ..

باركي وقوف الحق

وادعى ف صلاتك للشهدا

يا أمايا ..

حشيش الأرض ماعدش حشيش

لكن شجر

طرح وروده ف التحرير

من غير شوك انقطف

انعطف .. لمنحناه .

(2)

يا أبويا .. نام وارتاح       

دا مبارك راح ..

والمسك انخلط بتراب بلدنا

داوى الجراح

ومفيش ملك ولا طابية ولا كش ملك

كل دا ماضى انشرخت صفحته

انكسرت سلاسله ..

 وجا وقت الحساب

بشباب يرسم صورة وطن .. 

صورة سكن ..

صورة أرض ترفض المستحيل 

خلاص يا نيل ...

 ابيضت صفحتك

عادت صحتك .. 

خضّر أرضنا ..

نور أرضنا العدم..

 دا الخوف إنهدم

يا شباب التحرير 

حى على الصلاح

حى على الفلاح ..

بعرق فلاح ضرب فاسه 

ف أرض خراب

اختشت .. 

طلع القمح مستحى بحلم مباح

بعامل غزل القطن ... 

كسا الفقير اللى انكسرت عصاه 

على حجر صوان 

يا ابويا ..

دم الشهدا ف التحرير ..

 صوته خرير

أجمل من صوت البلابل .. 

والسواقى اللى انتشت ..

 فتّشت ذكريات الماضى

قوم يا مصرى شيل الغيمة ..

 هز السحاب

مفيش غبار ف أرض الوطن 

****محمد عزام الكيال