ياللى حتسمعنى للمصلحة
×××××××××××××××
يارفع أسعارك بالسوق..... وبتمص دم الناس الغلابة
ياظالم نفسك وظالم ..........الناس وفاكرها حرفنة
ياواكل حقوق اليتامى ....وغلطان بحساب المسألة
يا سارق حق الشقيان .......وناسى عقابك والآخرة
يا خاين ناسك ووطنك.... كالكلب اللى كله منجسة
ياكافر بوجود ربك وأخرتك ..بقت خطيرة مزنجرة
يا آذى الناس بسحرك .وأعمالك أخرتك نيلة مطينة
ياقاتل من غير حق .....مصيرك نار والعة بالمحرقة
ياكسبان فلوسك بالربا ....خسارتك حتكون مؤكدة
يا للى بتتكلم فسيرة.. أعراض الناس من غير بينة
ياللى ديما كثير الغضب...... أمسك فرملة المرجحة
ياللى عنيك حسودة وقلبك بالحقد مالى كالمسودة
ياللى بتلعن على الأحوال ....لسانك عايز المقصفة
أوعاك من أذى جارك وكلمه وعامله من غير تربسة
إوعاك ياواد تكون سايق........ الهبل على الشيطنة
وتفتكر انك تقدر تغسل.... أيديك من شغل الهرتلة
او تفتكر أنك تهرى فى كلام ملوش معنى يازغللة
وكلامك كلام بالهجايس.... ومفيش فعل يا شقلبة
والدنيا ضلمت بعيون الناس ...وبقت نارها مولعة
والكل بيكلم نفسه والخنقة وصلت لحد المسخرة
والناس ماشية تحك ..ببعضها والحق بقى مقلسة
دنتا آخرتك شوية تراب محطوطين في المقبرة
ريحتهم فايحة وأشلائك............ ياجميل متبعترة
والدنيا راحت أصلها ......إزازة مقفولة ومتصبرة
قاعد مستني تطلع...... بمصلحة والدنيا متشقلبة
والشمس بالسما وبتيجي.... سحابة وتبقى مكشرة
والحكاية جوة الرواية ...سطور وحكاويها متكررة
ونفسك تلقيلك سبوبة ....وتاخدها بيضة متقشرة
اسمعنى وراجع حسباتك... عشان تقضى المصلحة
أديب وشاعر مهندس /محمد عوض
14/1/2023
المشاركات
