محمد سليمان حسن ديوان تركة واجع البلد مصر مواليد 29\4\1977
صفحه. 1.
حكم ظالم
اسمحى لقلبى
يحل عليكى ضيف
عارفه نبضو ملهوش صوت
نبضو سكوت
وربى هيبقى ضيف خفيف
كلمى وقت فراغك
اشغلى وقتك معاه
لو هيكدب او ينافق
اطردى هو وهواه
اسألي وهو يجاوب
خلى نبضو يبقالو صوت
افتحيلو باب غرامك
متحكميش انو يموت
ليه بس انتى حبا عذابو
م اللى جالو واللى نابو
بفعل فاعل
لما سهم الحب صابو
هو جاهل
فى ميدان الحب
اعزل وكمان غشيم
بعد ماتعود عليكى
ترمى جحيم
هجر وفراق والاشتياق
ليكى ضناه
شفتى قلبى
لم حب فى يوم قضاه
واللى قضاه فى حكمو ظالم
داسو ورماه
والحكم صارم
#محمد_سليمان_حسن
صفحه. 2.
عتاب قلم
ليه كل الكلام هربان
وانا اللى بعشق الكلمة
ليه عقلى م الكلام خايف
شعور زايف وايه العله
انا الفارس م بين حروفى والكلمات
انا اللى كنت بتمختر م بين الشعر والابيات
أبات مهزوم وقلمى م الكلام مرعوب
هجر دافاترى والاوراق
وقال عايب بيهجى بس فى المعيوب
يا صاحبى فوق لأحوالك
وبيتنا ازاز بلاش نرمى بقى بالطوب
وليه حاببب تبات غالب
ماتعذر مره المغلوب
انا قلمك انا تايب
و متبرى كمان منك
انا اللى بعلن العصيان
لقيت نفسى بعيد عنك
بنام مرتاح ومش لايم على نفسى
سكوتي كلام لاكن باين
سكوتى يا صاحبى من يأسى
حاولت كتير عشان ارضيك
ومن حبرى صنعت رصاص
جرحت بيه قلوب ياما
انا قلمك ومش قناص
وبدعيلك تتوب زيى
ورب الدعوة دي بأخلاص
مهو انت من زمان عشرة
وكنت فى يوم اعز الناس
#محمد سليمان حسن
صفحه. 3.
الرقعه
انا البيدق وفى الشطرنج ترتيب
فى اول صف
بحارب رغم عن انفى
ومين خلفى انا معرفش
واول خطوه بمشيها
دى اعلان لبداية حرب
ماليش ذنب أنا فيها
وغصب عنى أسير على الدرب
وايد بتشلنى من راسى تحركنى
شمال ويمين
وفاكره انى مش فاهم !!
صنم جاهل
ملعونه يا بنى أدمين
بتتحكم فى أقدارنا
وترسم لينا خطاوينا
وغلطه من لاعب ساذج
برا الرقعه ترمينا
ونفس الشخص راحلو وزير
يموت الفيل وبعده حصان
فاضل طبيه بتتلفت
عشان تحمى ملك حيران
بعد ما اندثر جيشه
فيل ورا فيل
بيدق وحصان
ومش باقى له غير طبيه
وكام بيدق ولسه حصان
ودور بيروح وكش فى كش
لعيب فرحان لعيب زعلان
ولاد ادم بمليون وش
ويخلص دور ويبدء دور
ومن تانى نقف نترص
عشان يجى لعيب ساذج
يكرر فين نفس الفصل
ونتعلم منتعلمش
عشان اصنام منتكلمش
#محمد_سليمان_حسن
صفحه. 4.
المسحراتى
صحو المسحراتى وطنى غرق فى النوم
عدى ميتين رمضان ووطنى مش بيقوم
لا حس بالفرحه ولا ودع الاحزان
يا وطنى يا مغلوب مقهور بين الاوطان
يا مسحراتى واحشني فينك بقالنا زمان
لا سمعنا صوت طبله ولا اصحى ياغفلان
اخدنا ع الغفلة والتوهة والحرمان
صحو المسحراتى قبل الاوان م يفوت
يا وطنى نومك طال اصبح شبيه للموت
والصبر وقتو فات ننده بعلو الصوت
يا مسحراتى انجدنا صحى الوطن ليموت
يا مسحراتى امانه ارجع تانى لينا
لأمه غفلانه تعالى صحينا
وأمانه وانت جاى تجبلنا طبله
هات طبله من حطين
قول لصلاح الدين
كل الطبول بعدك فى وطني مكسورة
والرايه محنيه والامه مكسيه ذل وضنى وهوان
يا مسحراتى شهل اظهر يا بكره وبان
سمعنا صوت الفجر م المسجد الأقصى
اكسر ايدين الغدر اشتاقنا للنصره
يا مسحراتى كفايه ذل بقا وحسره
#محمد_سليمان_حسن
صفحه. 5.
اه يا وطن
اه يا وطن حظك غريب
بدل الحبيب مليون حبيب
والف اه من الحبايب كلهم
ساعة الوجع ملقتش حد منهم
واما الطوفان اجتاح شوارعك والبيوت
الكل قال نفسي والكل من بعدي يموت
وكل من حب النجاة
قبل الحياة... اي حياة
من غير كرامة او شروط
فوق بعض دوسنا
وحنينا روسنا
عمیت قلوبنا قبل العيون
وبقينا على روحنا نهون
اه یا وطن اسیر مهوش لاقي النجاة
اه يا وطن عايش ومش لاقي الحياة
اه يا وطن قلبك حزين
والحزن بالغ منتهاه
محمد سليمان حسن
تركة وجع
ابويا كان يحكى زمان
كان يا مكان
جدك ده كان رجل جدع
فارس ويشهدلو الميدان
ترك لنا تركة وجع
فيها الانانى والوصولى
والمغيب والجبان
خليك بعيد
انا عشت عمرى كله وحيد
رافض كيانهم قافل بيبانهم
عشان تعيش انت سعيد
اوعي فى يوم تعيش مابينهم
لا هم منك ولا انت منهم
على نفسهم الله يعنهم
ابعد تعيش يابني فى امان
ولو فى يوم جمعك مكان
مع حد منهم قول لهم
ابويا وصانى زمان
اعيش وحيد زيه تمام
محمد سليمان
انتى العشق🤍
شكلك ست من برة
ومن جوه مدينة عشق
حضنك جنة الدنيا
اسيبو ازاى وفيه انا عشت
انا طفل فى بستانك
لا يعرف عمرو خوف من حد
انا مخلوق علشانك
انا كيانك
انا الشمس وانتى البرد
انا الشوك اللى يحميكى
مادمتى انتى جناين الورد
انا نهر اراضيكى
واعيش العمر ارضيكى
انا ليكى انا بيكى
ولو مرة اشوف عطشك
انا من دمى ارويكى
واقدم روحى لو توفى
يارب الروح تكفيكى
#محمد سليمان حسن
الشمس انتى
يا قسوتك
بتقولى كنت اتمنى
اكون من قسمتك
يا قسوتك
ده انا يادوب
لو مره واحده تحضنيني
فى ثانيه فى حضنك ادوب
يا ضحكتك اللى بتسحر قلوب
من بسمه واحده
الكون قوام
يصبح شروق من غير غروب
ياشمس مين يوصلها
يا فرحه ومفيش زيها
يا نور ونار يبقى انتحار
لو حد يطلب ودها
محمد سليمان حسن
وصاني ابويا.
مسكين وداير في الدنيا.
علي حد يشيل همك
.
ومين يا ولدي هيصونك
من بعد ابوك وامك.
حملك تقيل
حاسس انوا حمل جبال.
خليك صبور
دي دنيا فناء لا محال.
تاعب نفسك محيرها
شمال ويمين.
وشرق و غرب
بتشكي الكرب طب صاحبوا.
ولو صابك فى يوم الهم افرح به
وقولوا يا هم.
انا والكرب تعاهدنا
وبقينا اعز اصحاب.
متيجى تبقى تالتنا
ونسوك علينا الباب
لحد يبقى رابعنا
ولا بكلمو يوجعنا
لغتنا الهمس والشكوي لرب الكون.
قدر مكتوب وانا وانتم ومين هنكون.
في حكمه مولي اختارنا نكون اصحاب.
وعشرة طويله جمعتنا.
ولا الاحباب
واللي يخون العشره فينا
يبقي خسيس.
هنخد ايه من الدنيا
عشم ابليس
دي ليها بدايه ونهايه.
وقانونها واضح وصريح.
وكلنا اكيد راجعين
قابلت كتير في الدنيا بني ادمين
فارقها الكرب واتسعدت
عصوا الرحمن.
وطردوا التقوي من روحهم
وعاشوها كما الانعام.
ضلال في ضلال
ويا ستار نجينا من الغفله
فيبقي الكرب شئ طيب
ويبقي الهم احسن حال.
محمد سليمان حسن
مين قدك
يا شغلاني انا والناس
يغير الورد من خدك
قلوب بتدوب قدر مكتوب
مفيش قلب على قدك
ومين قدك
ده فى عيونك قصص عشاق
عاشو على أمل ودك
وانتى الشمس فى سماها
ومن يوصل فى يوم عندك
يا شغلاني وكل مقول
مسيري هنول
تزيدي يا حلوه فى عندك
محمد سليمان
يوم ميلادك
النهارده في يوم ميلادك
بسأل الله العظيم
اني اعيش واشوف ولادك
ويحفظك من كل عين
لا تشوف ضني ولا عذاب
متدوقش ابدا اي مر
تعيش عزيز ومحترم
متشوفش ذل
وتبتسم لك الحياة
ف تعيشها حر
من غير آلم من غير دموع
وصوت ابوك اللي اتخرس
يصبح آذان
علي لسانك يا ابني احذر
ماتعيش ابدا يوم جبان
ولا تاخدني قدوتك
امسك في حقك احفظه
اصل حقي عليا هان
شوف يا سليمان
حالي انا وحال ابويا وابوه كمان
علمونا ومن زمان
كلنا نبقي ودان
نسمع وبس كلنا نبقي جبان
ولا لينا حس
علمونا ان الكلام اكبر جريمه
ناكل ونشرب نتعلف
زينا زي البهيمه
حتي البهيمه بتعترض ترفس وتنطح
لكن احنا يا ابني بنتولد زي الشجر
لو موتنا حتي من العطش نقول قدر
سامحني طولت عليك
بس عشمي يابني فيك
خلاني اقول
اوعي تفتن يوم عليا
اصل انا بين السطور
راجل جبان
#محمد_سليمان_حسن
بغير
كل ذنبي اني في حبك اناني
كل ساعه بعيشها جمبك
هي عمري هي فرحي
هي ورده زرعها قربك
جوا قلبي انتي كياني
بتلوميني اني بغير
ده انتي غير الناس وغير
انتي حوا وكل ادم
ع الارض يتمني ينولك
انتي غنوة والف شاعر
ما يكتبوا كلمه في سطورك
انتي نور كل الكواكب
مرساه لكل المراكب
فرحه للقلب الحزين
انتي طب المجروحين
فمتلوميش
اللي شايله بين ضلوعي
مش قلبي ده انتي
هو انتي فاكره اني بقلبي بعيش
انا بعيش بقلبك انتي
انا مقاتل وانتي مدينتي
انا ابيع عمري فداكي
اموت شهيد وتعيشي انتي
#محمد_سليمان_حسن
حبة بخور
يظهر كدا اني خسرت المعركة
حبة بخور هندي و جاوا و مستكة
بخرت نفسي من عيون الحاسدين
يمكن في يوم قلبه يرق
يمكن ف يوم قلبه يلين
سبع ليالي لا سؤال
ولا حتى رد بكلمتين
روحت لشيخ العطاريين
شافني جريح مسكين حزين
قال البخور للمحسودين
لكن انت عاشق
والعشق عندى مالوش دواء
روحت لكبيرالسحارين
في قلبي شئ من الامل
قالي هعملك حجاب
ودق زار وكمان
لازم لك كام عمل
اسم حبيبك يا ابني ايه
قلت هما تلت حروف
هجر وندم ودمع هان
على اللي عشقته
وهو خان
رد وقال حل لغزك
مش هنا
الحب يا ابني بدون امل
ملوش علاج هنا عندنا
#محمد_سليمان_حسن
صفحه. 14.
ضوء الفجر
يا دولة الملايين
يا ام الكرم والجود
الحق مهما غاب
مسيره يوم هيعود
والظلم مهما زاد
رب العباد موجود
ليه تزرعوها فساد
يوم الحصاد موعود
والصبر لو كان بحر
للبحر برضو حدود
موج الغضب لو عيلي
زرع الفساد هيموت
يا وعد يا موعود
انصب ميزان العدل
خلى الغيامه تزول
وحشنا ضوء الفجر
خلى الفقير لو مره
ينطق بكلمة لا
صحى الامل جواه
ورجعيله الحق
هيرمى توب الذل
ويغير الخالقات
يلبس توب الكرامه
يزرع كلام لولاد
مفطومه ع الكتمان
اترابو ع الاها
والتوها والحرمان
والجبن خلاها
مدنه ومالو اذان
عمرو م علاها
علاها غيرو زمان
ايام مكان يا مكان
الحق مرسها
#محمد_سليمان_حسن
ليست هناك تعليقات:
إرسال تعليق