كبرت يا إبني
بقلم سامي محفوظ حنا
كبرت يا إبني
وما شاء الله قويت وعلى أبوك لسانك
طول واستقويت
كنت فاكرك سند ليه
وبعدي كبير البيت
ليه تخليني أقول
يا ريت ما ربيت
ليه تخليني أندم
على انك في الدنيا جيت
يوم صوتك ماعلى
عليه ووقفت قدامي
قلبي اتملى من الحزن
وفاضت عنه أحزاني
كنت بدعيلك وافرح
وأنت بتكبر قدامي
مش عايل هم لما أكبر
وابقى عجوزورجلي مش شيلاني
علشان ابني راح
يكون سندي وعكازي
ونور عينيه ياخد
بيدي لو العمى جاني
ده أبني وحته مني
عمره ما يهملني
ولا يخليني أحس بضعفي
ولا من عجزي اوعانى
حلمت لك يا ابني بحاجات كتير
تبقى كبير و أحسن مني
تشرف نفسك وتشرفني
وأفتخر بيك واشاور عليك
وبصوت عالي أقول ده أبني
حاجات كثير
كانت لبك في خيالي
بس ما جاش أبدا على بالي
يوم ما تكبر قدامي
بدل ما افرح بيك
تكون السبب في احزاني
وخلتني اتمنيت قبل اليوم
ده كنت من الدنيا انتهيت
وإنت ما كنتش جيت
ولا كنت على أبوك استقويت
بقلم/سامي محفوظ حنا
0 التعليقات
المشاركات
