.. ديوان ريحه البيوت.. للشاعر.. شريف الرومي

إهداء لزوجتي و اولادي أسرتي الصغيرة التي هي الدنيا بالنسبة لي

صفحه. 1.

1جميلة (كل حاجه)

كل حاجه زمان جميلة 

حتي ريحة البيوت

كل كلمه من ابويا

او قلم او علقه موت

كنت بتنرفز زمان

كنت نفسي ساعتها اكبر

كنت فاكر الامان

لما اتحكم و أأمر

بس دلوقتي خلاص

نفسي الاقي نفسي اصغر

نفسي العب في التراب 

نفسي اتمرجح و اكسر 

نفسي انام علي حجر امي

او احس بحضن ابويا

نفسي اجري في الشوارع

نفسي ادفي بأخويا

بس ما باليد حيله

السعاده بقت قليلة

العيون ضحكتها راحت

كل حاجه بقت بخيلة

شريف الرومي

صفحه. 2.

2عابر سبيل ****

انا نفسي اعيش في الدنيا زى عابر سبيل 

اكون زى النسيم و عمري ما أأذي غير

أَوزّع ضحكتي على عيون البشر

و حتى لو بكيت ازرع في القلب خير 

نفسي يكون كلامهم على كان جميل

كان طيب الأثر كان طيبه في قلب ويل

و الناس تذكر محاسني و تدعي بظهر غيب

و تقول ده مات شباب و عمره ما كان تقيل

يا رب اكون خفيف على الناس اللي مني

لا اكون سببت ضيقه لحد كان ظالمني 

انا مسامح يا رب و بطلب السماح

منك و من عبادك و تهديني الدليل

شريف الرومي

صفحه. 3.

3راح الأمان

راح الأمان م الدنيا و معدش بني أدمين 

اللي إنت فاكرة ملاك و هو م الشياطين

عمري ما جيت على حد و لا مرة إستقويت

لكن يا دنيا صحيح أنا و الله جد حزين

دايما براعي الناس لو حتى مش مني

و صبرت على غدرهم و كانوا لايمني

ياما صبرت كتير طول عمري بعمل خير

هو اللي طبعه الخير لازم يبات في أنين

بدعيك يا رب الكون قويني صبرني

ليه كل ما أعمل خير الناس بتكسرني

انا برضه ح أتشبث بكل طيبة قلب

بس الجرح اللي صابني عاوز له طب سنين

شريف الرومي

صفحه. 4.

4صديق

مش لازم يبقي اخ 

عشان يقف في ضهرك

ممكن يكون صديق 

تلاقاه بيسّد عنك

أُمك مولدتوش

مفيش بينكم مصالح

لكن في أيّ شدة

تلقاه بلسم و طارح

قالوا زمان الصديق 

تلاقاه في وقت ضيق

و اللهِ في كل وقت 

ده كلام حق و حقيق

الصاحب ده سند 

مهما غاب الصباح

بيهوّن الألم 

و يطيّب الجِراح

حتعرف لو سافرت

مين الصاحب بجد

صاحبك بيمد إيده

لو كل باب إتسد

شريف الرومي

صفحه. 5.

5مش ندمان////

اللي عاوز يعرفني اهلا سهلا بيه

و اللي عاوز يخاصمني  اردم حط عليه

انا و الله ما ناقص  و لا يفرق ويايا

انت يا واد او غيرك  قولي حتعمل ايه

لما تقل معايا  و تقول اي كلام

انت خلاص و لا تسوي  يلا بلاها سلام

انت خلاص مش صاحب  و لا يوم كنت صديق

و لا  تاني ممكن اقبل  سوا يجمعنا طريق

كنت بحايل نفسي و اقولها بالراحة

احنا في غربة و كربة بكره ح تيجي الراحة

بس بدال سبقت  و انت بفجر بدأت

خليك واثق اني مش ندمان بصراحه

شريف الرومي