صفحه 1.
السيرة الذاتية للشاعر مجدي الشيخ
الإسم/نجدي أحمد محمد الشيخ
الشهره/ مجدي الشيخ
الصفة/ شاعر وأديب مصري
تاريخ الميلاد/١٩٧٥/٧/٢٢
محل الميلاد والإقامة/اسكندريه
الحالة الإجتماعية/ متزوج
صفحه. 2.
... إشتقتُ إليكِ...
إشتقتُ إليكِ يا أمي
ولكسرةِ خبزِِ من خبزِك
لطعامِِ يحملُ انفاسِك
وثيابِِ كانت من صُنعك
إشتقتُ لأسمع كلماتِك
في قصيدةِ شعرِِ من شعرِك
إشتقتُ لرنةِ خلخالِك
تشجيني بصوتِِ من قدمِك
إشتقتُ إليكِ فرحتُ افتشُ
واشمشمُ في بقايا عطرِك
أنتظرُ الريحَ لتحملني
وتقذفَ بي على شطِك
إشتقتُ أعودُ كما الطفلُ
أعبثُ وألملمُ في شَعرِك
ينهاني الأبُ فأبتسمُ
وأفرُ لأختبئُ بصدرك
من غيرُك يمسحُ لي دمعي
ويزحزحُ أو يحملُ همي؟
إشتقتُ إليكِ وفي شوقي
قبلاتي إليكِ يا أمي
... مجدي الشيخ..
الهوايه/ الشعر والأدب والموسيقى والغناء والرحلات
الأوسمة والجوائز/ حاصل على العديد من الأوسمة والجوائز أهمها
جائزة أفضل قصيدة عامية من وزارة الثقافة المصريه عام ٢٠١٧،وجائزة أفضل قصيدة عاميه في الوطن العربي من اتحاد لقاء الشعراء والأدباء والفنانين العرب عام٢٠٢٠
صفحه. 3.
...حطها في عنيك...
والله الدقه دي لك ياجميل باهديها إليك
ودي أجمل دقه تكون يمكن حتعدي عليك
حطها ف عيونك وافهمها
وان عوزت جواب مني اسألها
حترد عليك
حتقولك أيوه دا بيك مفتون
عشقان ولهان بيموت ف عنيك
ودي أجمل دقه تكون يمكن حتعدي عليك
حُطها ف عنيك
بقلوبنا علقنا الزينه وجينا نهنيك
والورد فرحان بيغني لميلاد معاليك
والدنيا بيك وانت معانا شيئ مش معقول
دا جمالها زايد في عنينا وربيع على طول
والتورته من صنع أدينا وبترقص ليك
على أجمل دقه تكون يمكن حتعدي عليك
حُطها ف عينيك
.. مجدي الشيخ..
... صديق ع الفيس...
لأ لا يمكن يا صاحبي
حتكون صديق عادي
دا انت الصديق الأصلي
وكل اللي بعدك عادي
فيه بيننا عشره جميله
وكفايه ف كل ليله
بنسهر ويا بعض
وننام بحلم ببعض
والروح بتنام معاك
وبنصحى الصبح بدري
ويشقشق بس فجري
تستنى مني رساله
ياحبيبي واستناك
فازاي بقى تبقى عادي!
يابو قلب طيب راضي
صحيح صديق ع الفيس
لكن انت أحلى جليس
ولا عمرك كنت عندي
ولا حتكون افتراضي
.. مجدي الشيخ..
صفحه. 5.
...هوه سؤال؟...
هوه سؤال لكن بيحَير
هوه سؤال واحد مش أكتر
كل الناس تكبر تتغير
وانت بتكبر بتزيد سُكر
هوه سؤال؟
إنت بتاكل زينا واللا
إنت الأكل بتاعك شهد
وهواك زي هوانا دا واللا
عمر هواك دا ماراحش لحد؟
جبت بخور علشان أرقيك
من شر العين ومن القر
نفسي اوصلك يوم أراضيك
بس ياريت تفتح لي ممر
قوللي حبيبي..سحر عنيك
ليه دا مافيش بقى منه مفر؟
هوه سؤال؟
ياللي عيونك فيها كلام
عايزه تقوله للعاشقين
اللي عيونهم مش بتنام
غير على شوقهم لك وحنين
والله تعبنا ف حبك ياما
والله تعبنا ومش عارفين
إن كان عينك جايه علينا
واللا لكل الناس رايحين
لو كان عندك لينا كلام
أوعى تقوله لناس تانيين
حاستناك لما تقولهولي
بس حاشوفك إمتى وفين؟
هوه سؤال؟
.. مجدي الشيخ..
... روح ياغرامي...
روح ياغرامي صحي غرامها
وقول لعيونها اوعي تنامي
وان نامت ياغرامي شاغِلها
ولخبط أحلامها ف أحلامي
واما تقوم.. بلغها سلامي
ولو زعلانه..ابقى ابعتهالي
يمكن اهون من أحزانها
يمكن اخفف عنها ألمها
والشوق يرجَع والنار تولَع
وارجع اقول الله من تاني
وغرامي يحقق أحلامها
اللي عشانها بَعَت غرامي
.. مجدي الشيخ..
... حلاوة الحب...
بعد لما تنام إيدينا
إيد ف إيد متشبكين
والعيون ويا الشفايف
شبعوا نوم فوق الجبين
يبقى إيه تاني اللي فاضل
من حلاوة الحب إيه ؟
الحياه بتمر بينا
وياما نِسيت عاشقين
واحنا زي ماحنا لكن
الحنين بيزيد حنين
لو حبيب القلب غاب
الإيدين تشتاق إليه
والإيدين لو ثانيه غِفلت
القلوب تسألنا ليه؟
يبقى إيه تاني اللي فاضل
من حلاوة الحب إيه
بعد لما ننام ونصحى
إيد ف إيد متشبكين
.. مجدي الشيخ..
صفحه. 8.
... مستحيل...
ليه تقول ان انتي خُنتي
وتتهمي بشيئ خطير
وانت شايف إني جنبك
وان قربك شيئ جميل
وانت عارف إن حبك
هوه عمري ومستحيل
حد حيفَرط في عمره
مهما كان إيه المقابل
مهما كان السعر عادل
في التَمَن أو كان كبير
مهما حتحاول تجادل
أو تناور أو تماطل
فاتهامك ليل باطل
ياحبيبي وشيئ خطير
.. مجدي الشيخ..
...لا ياروحي...
لا ياروحي مش حينفع
إني اكون لك استراحه
واما تتعب عند غيري
مني تطلب السماحه
وان سألتك أو عاتبتك
مش بناخد غير بجاحه
إنت فاهم إن كذبك
والنفاق يعني فلاحه!!
لا ياسيدي مش مسامحك
إلا لو قلت الصراحه
لا ياروحي مش حينفع
إني اكون لك استراحه
.. مجدي الشيخ..
...كل العرب أوطاني...
شاعر زمان كان قالنا
كل العرب أوطاني
طب هوه فين ينظر لنا
في الأمر دا من تاني
فيه خونه بيبيعوا الوطن
وشعوبنا بتعاني
وبدال ماهمه يعينوني
بقوا همه سَجاني
والله لو يرجع يعيش
في زماننا ويعاني
لكان يقول ان العرب
همه السبب في جناني
.. مجدي الشيخ..
...حاول بس...
حاول بس تقرب مني
أرجوك قرب باترجاك
محتاج شمسك.. محتاج ضلك
محتاج أتنفس بهواك
محتاج أفرح بيك يوم عيدي
محتاج دم جديد في وريدي
محتاج إيدك تمسك إيدي
ماتسيبنيش طول مانا وياك
محتاج دمعك يلمس خدي
محتاج حضنك يحضن حضني
محتاج كلك تيجي تاخدني
زي ماكلي رُحت معاك
ماتسيبنيش للوهم يوسوس
أو لعزول بيحب يعَسعِس
صدري يضيق ماقدرش اتنفس
أرجوك قرب باترجاك
محتاج شمسك.. محتاج ضلك
محتاج أتنفس بهواك
.. مجدي الشيخ..
..بعيوني أضمن لك..
بعشق جمال الريح..لو ييجي من يمَك
أو لو يغني الطير..ويجيب جواب منك
تعالى قرب خُش..في عيوني أضمن لك
تدوق حلاوة الحب..ع الشفه ياعيوني
ويكون طريق الحب.. أسهل وأجمل لك
.. مجدي الشيخ..
..حبك أي كلام..
لو شوقَك حيجيبك لينا
كل تلات تيام
يبقى الشوق مضروب ياحبيبي
وحبك أي كلام
روح لبتاع الشوق يوصف لك
شوق مضمون.. ملفوف بهيام
ع الريق تاخد منه شويه
وياريت قبل كمان ماتنام
.. مجدي الشيخ..
...مش محتاج...
مش محتاج منك لحاجات
محتاج منك لمشاعر
خليتني ف حبك حبيت
أكتب شعر بقيت شاعر
سَكِنتك إنت ف أجمل بيت
لسه ماقالهوش ولا شاعر
لا قاله قبلي مجنون في ليلى
ولا قاله قبلي جميل بثينه
ولا حتى بعدي حيقوله شاعر
.. مجدي الشيخ..
تم فتح ديواني بعنوان إشتقت إليكِ
....راجع ليه؟....
بعد ماداق منك حرمان
بعد مالف وراك سنتين
قلبي رجعلي زي زمان
سبعين دقه وفوقها اتنين
راجع ليه؟
راجع ليه تفكرني بماضي
وجرح داوايته خلاص ونسيته
وان كان راجع لجل آهاته
واللا تزيد دقه ف دقاته
لا ياحبيبي دا كان ع العين
قلبي رجعلي زي زمان
سبعين دقه وفوقها اتنين
راجع ليه؟
كان لك معبد جوه ف قلبي
كنت بتعصى وهوه يصلي
وبيدعيلك يصلح حالك
وانت تزيد عصيان وتخونني
لا تقول كنا وكانوا وكان
بعد الحب مابيننا اتهان
لا ياحبيبي دا كان ع العين
قلبي رجعلي زي زمان
سبعين دقه وفوقها اتنين
راجع ليه؟
... مجدي الشيخ...
صفحه. 16.... صباح النصر لفلسطين...
صباح الورد والياسمين
صباح زيتوننا ويا التين
صباح عودتنا لبيوتنا
ونصر يصون كرامتنا
صباح النور على عيونك
صباح النصر يا فلسطين
بدينا الثوره من غزه
ونضفناها م الخونه
نادينا وبس ع الشرفا
فلبوا ندانا قالوا آمين
صباح النور على عيونك
صباح النصر يا فلسطين
رفعنا الرايه ع الأقصى
وع المقدس ليوم الدين
وباسم الله بعون الله
نرَجع ليكي يوم حطين
صباح النور على عيونك
صباح النصر يا فلسطين
.. مجدي الشيخ..
صفحه. 17.
... الفصول الأربعه...
كل ما تتغير باتحير
واتغير وياك يازمان
زي الفصول الأربعه
وكل فصل وله أوان
فصل حلو وفصل مال
وفصل بيسوق في الدلال
وفصل فيه كل البدع
واللي يمشي بيتنسي
واللي بييجي يعمل جدع
واحنا دلوقت ف خريف
العمر أوراقنا بتقع
... مجدي الشيخ...
صفحه. 18.
.... النظره من دي بكام ؟....
لو يوزنولي الدهب.. بالكيلو مش بالجرام
ولو جابولي الفضه... أكوام وفوقها اكوام
راحقول هاتولي نظره..م العيون دي كفايه
وشوفوا إنتوا النظره..م العيون دي بكام ؟
.. مجدي الشيخ..
صفحه. 19.
. كتر ألف خيرك .
لا انتي ولا غيرك
كتر ألف خيرك
قلبي الخالي عايز يبقى
خالي ومالهوش أي سابقه
وان قدرتي عليه دا يبقى
كتر ألف خيرك
قلبي لما شاف جمالك
والهيام اللي ف خيالك
للحبيب الأولاني
فضل يهرب م المسابقه
خاف لتبقى علينا سابقه
وان قدرتي عليه دا يبقى
كتر ألف خيرك
إنتي عملتي اللي عليكي
بس برضو نصيحه ليكي
روحي للي كان شاريكي
وقلب غيرك ما اشتراش
واحنا نفضل زي ما احنا
بيننا حب وأوفياء
بيننا حب وحب أحلى
بس حنكون أصدقاء
.. مجدي الشيخ..
. رسالة إلى الشعراء .
الشعر لو قلناه
من غير معايشه معاه
في كلام كتير بيتوه
بين الكلام معناه
الشعر مش بس كلمه
وقافيه والسلام
ولا بوزن القصيده
ولا بنوع ال اقلام
دا الشعر فكره وصوره
وعشان تكون في الصوره
لازم تكون رسام
.. مجدي الشيخ..
صفحه. 21.
. قصائد ممسوحه .
كتبت فيك قصايد
يمكن وِصلت ألوف
بحروف م القلب تشكي
سِهرت حواليك تطوف
لكن ياخساره رِجعت
من كتر ما طافت تِعبت
وياريت تاهت مارِجعت
ممسوح منها الحروف
.. مجدي الشيخ..
صفحه. 22.
. مايهمكيش .
يا نجمه عاليه في السما
هوه انتي ليه ما بتنزليش؟
جيت النهارده أودعك
قلت الحقك ..مالحقتكيش
وحياة مقام سيدنا النبي
زيدينا نور.. وماتبخليش
وان كنتي خايفه ان السما
راح تنطبق ع الأرض
ياستي لأ بس انزلي
مايهمكيش
.. مجدي الشيخ..
. فُكَك م السفر .
يا إبني فُكَك م السفر
والهجره لبلاد ما لها تاريخ
بيعشموكم بالدولار
وتروح هناك يطلع بطيخ
وبلاها تحلم بالكواكب
لتلاقي نفسَك في المريخ
تسقط هناك في الجغرافيا
ترجع تقول فينك يا تاريخ ؟
.. مجدي الشيخ..
صفحه. 24.
. شَخشَخ جيوبك .
شَخشَخ جيبك وطَلع
من قبل ما تندَفَن
والدود ياكلك وريحتك
تطلع آخر عَفَن
دا البخل يا إبني جنون
وان كان عندك ظنون
الجيب في البنطلون
وما فيش جيب في الكَفَن
.. مجدي الشيخ..
. بلاش تبُص لغيرك .
ماتبُص يا ابني لنفسَك
وليه لغيرك باصِص!؟
دا انت الل فاض من عندك
كان عند غيرك ناقص
ماتخِف يا ابني شويه
دا الحِمل زاد وشويه
والدنيا مِستقويه
واللا انت مش حاسس ؟
.. مجدي الشيخ..
. ماتنامش خفيف .
لو كنت جعان ماتنامش خفيف
كُل فول وشوية طعميه
أو علبة تونه بنص رغيف
واياك تتعشى بمُلوخيه
ع المعده تقيله بشكل مخيف
م الطشه ونار التقليه
وبلاش فلسفه وبلاش تأليف
وان كنت مصمم ع البوليبيف
إطمن طب ع الصلاحيه
.. مجدي الشيخ..
. روح ياجرحي .
ليه ياجرحي ليه بتشكي
والدموع نازله بآهات
ليه فاكرني وليه واخدني
للعذاب والذكريات ؟
روح ياجرحي بعيد لواحدك
واتألم واسهر براحتك
ليه وليه لساك بتشكي
وهوه حبه فقلبي مات!!
روح ياجرحي الله يجازيك
إنت ليه مش راضي تنسى؟
ألف جرح ف قلب غيري
خف وانت تنام وتصحى
روح ياجرحي وهاتلي فرحي
روح ياجرحي وهاتلي هات
ليه وليه لساك بتشكي
وهوه حبه فقلبي مات!!
.. مجدي الشيخ..
. العاصي والإمام .
رُحت للشيخ الإمام
فوق خدودي بدمعتين
قاللي مالَك ليه بتبكي
قلت عاصي من سنين
قاللي ربك ماظلم
قاللي ربك رحمته
هيه اللي خلت لك أمل
بس يا ابني في قدامك سكتين
سِكه حيقابلك مَطَب
وسِكه حيقابلك دِيبين
إمشي دوغري واوعى تكسر
ع الشمال أو ع اليمين
وهناك حيقابلك مقام
خُش صلي ركعتين
همه دُول طوق النجاه
وِشَك حتلاقيه منور
والديابه مسَلمين
والمطب تعدي منه
تلقى باب التائبين
خُش واستغفر لربك
ويا باقي المذنبين
واوعى تحكي لما ترجع
عن معاصي المستوردين
واحمد ربك يا ابني واشكر
ع النعيم دا بسجدتين
.. مجدي الشيخ..
. سفينة نوح .
سفينة نوح تشاورلي
وقُلت يارب نجيني
أقرب ليها تزغرلي
وأمسك فيها ترميني
يانوح وياك انا مآمن
والمركب ليه ماهوش آمن
وعندك ناس بتأذيني!!
فِضِلت اصرخ بصوت مبحوح
طوفان جامد وفين حنروح؟
ورايح فين كدا لوحدك
دا إحنا ان تُهنا من بعدك
حنغرق بالسفينه يانوح
يانوح انا كنت تلميذك
وشاطر والله ع الآخر
وفاكر لما قُلتِلنا
حننجح بعد مانذاكر
وادينا تِعبنا وسِهرنا
وذاكرنا اهو الكتاب كله
من أول كلمه للآخر
وليه دلوقتي تنكرنا
وتقول ان انت مش فاكر
ويطلع ليه البليد أول
وانا اللي تِعِبت في الآخر!!
ورايح فين كدا لوحدك
يانوح اسمعني من فضلك
دا إحنا ان تُهنا من بعدك
حنغرق بالسفينه يانوح
.. مجدي الشيخ...
رداً على مزحة لصديق لي بأنه سيسرق إحدى قصائدي التي أعجبته، ونشرها على صفحته الشخصية بالفيسبوك
. إسرق ولا يهِمك .
ياسيدي دا احنا بننده
ونقول يافيس بوكي
أما انت صديق حقيقي
وأصلي مش بوكي
واقسم معاك اللُقمه
لو هيه فوق بُقي
ياسارق شِعري مني
والعقل من قلبي
ياحبيبي دا إنت تؤمر
تؤمر وانا نلبي
واسرق ياسيدي اسرق
لكن خليك حِنين
وسيب لي بس الموبايل
والمحفظه وبوكي
.. مجدي الشيخ..
. عِشِقت الحب .
عِشِقت الحب لو مِنك
عِشِقت أن انتي جوايا
ودقه ف قلبي بتقولك
عِشِقتِك بس وكفايه
عِشِقت الليل في لون شَعرِك
ولون الورد من خَدِك
ونِسمه ان جاتني من عندِك
أشمشم فيها وكفايه
عِشِقت الصبح لما اصبح
ألاقي عنيكي بتصبح
واجيب سجادتي وأصلي
وأدعي بعد ما أسَبح
واقول لك يخليكي
وادلع كل شيء فيكي
ياعمري ولا مالا نهايه
عِشِقتِك بس وكفايه
دا إنتي صرتي في عيوني
وف قلبي أحلى رسمايه
عِشِقتِك نجمه في سمايا
وبسمه وأحلى ضحكايه
فعشِقت كل شيء فيكي
عِشِقتِك بس وكفايه
.. مجدي الشيخ..
. مش راحقولِك .
مش راحقولِك إنك إيه
ولا زعلان منك طب ليه
بس حاقولِك إنك غاليه
وأغلى كتير م العشره جنيه
اللي عشانها عملنا خناقه
وجيبنا جيران كانت مشتاقه
تسمع بينا يابنت الإيه
وياريتنا نكون اتعلمنا
من درس امبارح وفهِمنا
سر البيت فيه فرض وسُنه
وما ينفعش نقوله لغيرنا
يشنع بينا يابنت الإيه
مهما حيحصل يفضل بيننا
ونتفاهم بشويش بشويش
حتى ان كَلنا الملح بعيش
حتى ان كنا حنلبس خيش
بس ماحدش يدخل بيننا
ويسمع بينا يابنت الإيه
.. مجدي الشيخ..
ليست هناك تعليقات:
إرسال تعليق