،، مد إيدك،، بقلم،، محمد عزام الكيال

مدي إيدك

متوشوشيش شمس النهار

لأجل ما يغيب حزني

ولا تهربي ..

من دمع ليل..

يخيب فيك ظني

أنا ..

مش شهيد حبك

ولا..أسير قلبك

أنا جرحك..دواكى

وإحنا سوا..

سحابة بتنازع

هروب مجروح

نقطة بداية للهرب

لرجوع الروح

أصرخ وأقول الآه 

بصوت مدبوح..

على صوتك..

لأجل ما ينكسر

جوانا الخوف..

لاجل ما أشوف ..

الخطاوى..

علي جبين الزمن

شقشق يا فجري

واكسر جمود الليل

وابعت نسيمك لحبيبي

يصحى ع المواويل

ما عدش فيا.. 

ما يخاف الوجع..

ولا الدموع الشبطانة

على كفوف الريح..

بتعافر ف الرجوع

أصل الحب أذان..

يسمعه العاشقين..

يصحوا لصوت الفجر

يرجعوا..تايهين

لو هاتصمى ودنك

طيب أغني ..لمين

لو هايبان كسوفك

هايغطيني ..الحنين

مدي إيدك ...ليا 

نمشي خطاوي بجد

على نور شمس العشية

ما هايبقى بينا حد

أصل الحدود مسافرة

يمكن يجيلها مخاض..

تتعذب ..تتوه ..تختفي

ما بين ..بلاد وبلاد

يظهر ما بينا اللقا

على شط سطر جديد

أكيد انتى عارفه

بس بتدارى ..

وإن كنت يوم تنكري

هاتنكوى بناري

أنا هابدأ الحكاية.. 

من أول النهار..

لا حبك كان بداية

ولا نهاية المشوار

      ********

      محمد عزام الكيال